دلحكوكلي كتلني الخوف
رجفة بجفي ..
روحي الليله متوتره !
طفيته ضوه الغرفه
شيطفي ضوه الگمره ؟
يكون انكلب كلي اتراب
واختلي بكبر ميت هله من يمه تتبره
دلحكوكلي كتلني الخوف
خاتل ختلة المطلوب دم والطالبه يدوره
انه مدوهن ، عشت خايف ، قلق دومي ،
مثل الدم هذن للدوم مو فتره
(ضموني بصرايرهن عجايزنه) ..
امان هناك مو خطره
دضموني ، ولو شامة بزند سمره
خوفي اعله الضهر مشدود
جن بت بيت شدة عل خصر وزره
فوك الغيم اريد اصعد
واشمر روحي مو عل كاع
كون بــ كوكب الزهره !
اريد اشرد ..
لحد المايلوحه الشوف ، لو نظره
يمته ارتاح ؟ دوخة مجودره اعله الراس
جن شيخ اعله راسه مجودره الغتره
من المامش اتعنت ،
لاهوسة عرس يمي ولا يمي عطر خمره !
من شدة ضجيج البال ماضايك حلم بالنوم
عيني تلوگ للسهره ..
وافز فحطان من قيلولة عيوني
واطيحن طيحة اخر گطره بالمطره
تره لـ بصدري تعبني منو شراي ؟
گلبي ابلا سعر سعره
ما عاشگ ولا مجروح من حلوه
المشاعر عنده مندثره
بس عيبه " القلق والخوف "
ذني الكسرن ضهره
رسول محسن
رد مع اقتباس
