احضنك چذب باحلامي
يعبرّني السكوت شراع لعيونك واضم عن شوفتك تعبي
واجيس چفوفك الحلوه اغاني وشمس عصريه وشعر شعبي
وحدر غصن الزلف عصفور اذب تعبي
وافز والگاك مويمي
واكفر بالصحو الباگك من عيوني ولچم گلبي
غصن عطشان ياگلبي
ياصاحب المتعوبين ياگلبي
هايم مثل المتيهين ياگلبي
هايم والدروب السود يغرك بيهن خيالي ويرد ضامي
واجيك من السهر للطيف احضنك چذب باحلامي
واگلك هاك
انه بدونك صور متشابهه ايامي
واگلك ليش ماتحله الليالي إلا من اگول اسمك
صدى ليلة مطر يندار بضلوعي من اگول اسمك
حزن كل الاغاني يورّد بروحي من اگول اسمك
واسافر بالونين شراع واسكت والبچي يرسمك
اسكت واشتعل والگاك بركاد النفس شهگه
واصبر الروح بالدخان
واجيك من الرماد ولايه محترگه
واجيسك مشتعل جمره بهبوب الريح
واطفه بأول الشبگه
واكلك ويّه كل شهگه اشتهيت اضحك بوجهك والدموع تزيد
ياذلّة دموعي التغفه كل ليله على الوجنات وانته بعيد
يارخص ال هلا التذبل وره البيبان وانته بعيد
ولك يبعيد يالبيه
يالبيك الضحك شمسين بيه من الحزن غنوه جنوبيه
وبيه من التعب چم ليل مابين السهر والحيف بهتت كل معانيّه
وليل من النشد والشوگ اضويلك بأثر كل دمعه گمريه
بأثر كل السمار الدافن همومي بتجاعيده
اخضّر كون الك جيه
مصطفى الخزاعي
رد مع اقتباس
