سميتك محنه وعاطفه واشواگ
لهو تگظي وكت شتريد سميني
واخذ شتلة غرامك يا عشگ يا شوگ
بس عاگول صدگ انته تنطيني
دخليني اعلى بختك انه ما مجبور
بيدي انحت اله واكفر بديني
وليش اطلع شمس وادري انته طبعك ماي
وتصعد غيم منه وتوگف بعيني
بلبل والقفص لا تحطني بالبستان
يا غصن اليميل بنار يچويني
كبرت اعلى السهر ومروتك سچين
شلي بكحلة غرامك كون تعميني
العشگ عندي عشگ ما عندي هيچ وهيچ
ترستك ماي خوة لا نداوة الكــــيت
طلع جودك شبج واسراري تتطشر
خاويتك عشب وي كل نسيم اتميل
جربتك شجر بالريح تتكســــــــــــــر
ومن صارت صدك ردتك ولو حاجـــوز
وغصب عذرك قبلتة اتخاف تتعـــــور
بزلاتك اضم ردتك ضمير اتصـــــــــير
وجذبت الصدك حتى انت ما تخسر
وعاونتك علي من شفت عذرك خاب
وقنعت النفس كلتلها يتغـــــــــــــير
لا كصرك طول لا فاض بيك الطيب
لا شمسك علت والراكد اتبــــــخر
لا مدك وصل والعين شافت نـــــور
لا كصرك طول لا لغزك اتفســــــــر
كدامك طحت ما شفت وجهك كام
وهاك ابسط مثال وشوف واتصور
ولك خشبة بطبر فركست جف حطاب
من شافت حطب كدامها اتطـــــبر
وجبت تعبي درب صغتة بعدالة ماي
يا درب الاصوغة وبعد ما تعثــــــــر
ياليل اليظل لو فجر يتعــــــــــــناه
يا كلب اليدك لو دمة يتخـــــــــثر
يا ذل النهر يقبل سواجي ايصير
وكبل كل السواجي الماي يتنطر
كلت تطرح ثمر غرني الخضار البيك
وبقت روحي اعلى فيك تالي تتحسر
راضي علة هذا الجرح
رغم الجرى والصار
علمني كثر النزف
اعرف نوايا البشر
واعرف شلون اختار
هواي بطبعهم رمل
بس الضميرة صخر
ما ياخذة التيار
وغيرني هذا الجرح
مو ذلك انة الجنت
بالمي اظم احجار
هسة اعرفت ينوكل
من يا مكان الجتف
وانكشفت الاسرار
وهسة من اشوف السعف
بوجه اكلة سعف
ما اوصفة بالجمار
وما ظل بعد للصبح
مد ايدة جف الفجر
ظل الصبح مشوار
بجيت طيور الحزن
الناس صارت شبج
وانة الوحيد اشجار
والعين الهة صور
ع الحايط معلكة
معليهة بالبسمار
شعليهة بالبسمار
هنيني بعد و انكت غبار الضيم
صار سنين محد هيج هناني
هنيني بعد خلي الجروح تهيد
و خل تسكت بعد مسحات دفاني
دحط ساتر فرح وادحر جيوش الشيب
مو وصلت زحف لوجوه رضعاني
مو كافي الثكالى تهلهلنا دموع
و تتورج عليها عيون جيراني
مو كافي العمر رافع شراع الموت
مبحر للمنايه و موتي سفاني
مو كافي المنو اندكت وشم عل الباب
يمتى اصرخ هلى بدكات بيباني
كافي ازرع جثث غصت لهات الكاع
ما يطلع ورد بخدود بستاني
مو جبنه العمر نختار بس لونين
الاسود للحزن و الابيض جفاني
ويا روجه التجي بعيوني مرسه تصير
اكل للروح مرسه وتقوه ذرعاني
وحضنك نار كبره وما جوتني النار
وعد غيرك طفو ورماد جواني
بس وشاربك يا عراق ما ذليت
ولا بردت كهوتي وطاح فنجاني
بعد موانة ذاك الينحسبلة احساب
انكسر سيفي دكلي اشيطعن اكرابي
ونسل منجل حصادي وكاعي شبعت بور
وملح الضيم فاظ وغرك اترابي
ونوم اهل الكهف ووسادة النسيان
ولا دكت محب وافززت بابي
وشبر عن النهر اتعب واحفربير
لأن ماريد اطلب حاسب احسابي
ترد باجرصحو وايصيربيها ازماط
اريد ازمط صدك خل غيرجذابي
