كافي ..إمدنگ أمشي إبين صحباني
بين أشتاگلك وأنساك
صرخت « كافي » بيباني
كافي .. إتطشرت چكليت
فوگ ثنين محد رايد الثاني
كافي ..إمدنگ أمشي إبين صحباني
كافي عيونك بكل وجه مرسومات
أغمض بالعقل ألگاك
أباوع للسمه گبل النجم تنشاف
كافي أتسمه بين الناس
هذا المن ضحكته يخاف
كافي الليل. ي الليل
يقراني جريده أتگلب وأنعاف
أنوي أنساك لحظه .. إسبوع أستغفر
وأرد أغسل ذنوبي بدمع قمصاني
وأنه وديتلك مكتوب وي الريح
گتلك بعد ماناسي
عراضة شيخ ميت
من يمر طارييك براسي
بس رديت ..
بس رديت مكسور الجنح
من گتلك إمتاني
بين أصرخلك إمتاني .. بين تگلي إنساني
طفل رديت أتتبع أثر خطوات
بس خطوات دفاني
الماله ربع بالجيش
يگضي الليل وحداني
رجعت أبچي
النخل من يبچي صعبه ينشف دموعه
لان ذرعانه تارسها الوكت سله
مثل راية حرب
أول عشگ هيچ
من تطيح يطيح الخلگ كله
صاحبها يظل ماينفهم شكله
رجعت أتلفت وطبع المهفه تدور
ابو الچاتل .. يظل مفضوح
بعگاله بعد بين السلف شله
بين الفرگه ..
بين السمه ذيچ المابقت زرگه
بين جروح گلبي الكلمن شغمگه
بين الناس من تتعمد تجرحك
لمن تسأل ..
مثل مديون لو لاگه اليطلبه
يظل يصب عرگه
ابو جرح الچبير يغني للدخان
باكيت الجگاير ينحسب شهگه
وصلت المرحلة .. أحسد فطور الحب
مثل ذاك اليگلوله مشت امك سفر
چم يوم وتردلك
ويدري الوادم تچذب
مو اول بشر گالولي متعذب
هلال العيد بالكاروك ومحدب
گلت ي .. ي صح .. لچن ياهوه يقروله العديله
من يجي المغرب
ياهوه اليحط ايده اعله ظهره
لو سهر يكتب
ياهو الينسه بيكم من يصلي شحاچي وشگايل
ياهو إيطيح طيحات السياج العالي المايل
ياهوه التسميه ناسه
هذا الشاب الامشيب
كافي أشتاگلك وأتذكرك شتگول
كافي ألگاك چلمه وتارسه الشفه
كافي أشتاگلك وأركض على البيبان
أرسمك جاي بالصدفه
كافي جفوني يبست خوف
رايد بالچذب أغفه
يلچمني الهوه .. ي يلچمني الهوه
وأتخيلك يمي وأرد أدفه
وأفز والگه البرد نايم على أحضاني
وأرد مثل الگصيبه أشبگ بذرعاني
أحمد علي
رد مع اقتباس
