هنا

[بحار تائه]

مرحبا شباب بنات

من فترة وانا أحس ممرتاح بحياتي وي اهلي وجاي تصير مشاكل ونفور وحتى في دوامي دائما متضايق وحزين ورغم ان راتبي خير من الله ينتلف بسرعه ما يبقى شي عندي وقبل سبوع صارت عركة انا واختي بدون سبب مجرد رجعت من دوام تعاركنا .

ان ما اؤمن بالسحر بس كشفت عند شخص من ضيق صدري فا تفاجئت بالي كالي بيه
كال مسويلك سحر اسود مرشوش باب بيتكم وماخذين صورتك انت واختك ومعمول عليهن السحر السحر تفرقه وقطع رزق كتله ممكن اعرف منوا الي سوى سحر كال مليون انطيك اسم الي مسوي سحر وهن نسوان اثنين وبمليون ونص اخلصك منه .
انتم ما رايكم في هذا الكلام افتوني يرحمكم الله .

[Haidar Iraq]

السحر موجود ..
بس هذا المبلغ هواي ..
شوف غيره ..

[^_AHMED_^]

كَله انطيك نص مليون اذا فعلاً خلصتني من السحر ورجع الوضع طبيعي انطيك المليونين
واذا لا ترجعلي العربون

[Haidar Iraq]

اريد افتهم ..
هاي النسوان .. من اتسوي هيچ شغلات ..
شنو تستفاد ..؟؟؟
خرررررب ..

[مقتدى التميمي]

فعلا السحر موجود لكن هذا السعر هواي
انصحك تشوف غيرة
و اعتقد ان ماكو داعي اصلا تروح لهيج واحد
اقرأ قرآن يومية وراح تنحل كل مشاكلك......تحياتي الك أخي الكريم

[سـمــيــر ..]

خلي احجيلك سالفه .. وانشاء الله مو طويله بس اسمعها تفيدك

فد يوم من الايام صديقي خابرني وكالي اريد تمشي وياي بشغله كتله وين مقبل يحجي وين .. لان كال اذا اكلك وين مراح تجي .. كتله اشلون اروح لمكان اني ما اريد اروحله ..

كال اذا اتثق بيه تعال وياي وهل مكان ما بيه اي خطورة او اي شي مؤذي ابد وقسم بالله وكال قريب علينا .. وهذا الشخص جداا صديقي وثقه رحت وياه ..

صعدنا سياره وصلنا دك الباب طلع شاب كاله ابو فلان موجود كال اتفضلو ادخل .. دخلنا للاستقبال وكان الاستقبال جنه من صور وأيات قرانية ومور دينيه عده ..؟

المكان الي احنى بيه لكشاف مثل صديقك الي طلب افلوس منك .. المهم صديقي ايحب وحده واكو امور معقده بينهم .. رايد ايشوف مستقبله وياها ايصير ميصير ..

حجاله الكليشه اسمه واسم امه .. والشيخ او الدكتور او ما اعرف شسميه .. كله لا هاي هيه شغلتك صايره وانشاء الله بعد سنه تتزوجون ..

باوع عليه الرجال وكال .. وانته كتله اني ماعندي شي مرافق ويه صديقي .. كال لا انته عندك شي مبين من اعيونك احجي لا تستحي .. يمعود ماعندي شي اصر اني عندي شي ..؟ كلت شخسران خلي اكله اي عندي شي واني ماعندي شي
كتله اني احب فلانه .. وفلانه مسافره .. كال اعرف .. وهوة اصلا ماكو اي اثر لفلانه جذب على العموم اخذ المبلغ من صديقي .... والزبده يا صديقي

صديقي الي سولفت عليه شغلته ابدا ما صارت ولا انفتح موضوعها .. والان هوة متزوج وعنده خير من الله

يا حبيبي ويقول الرسول صلى الله عليه وعلى اله وسلم ؛ قال : ( كَذبَ المنجِّمون ولو صدقوا ).. لا تصدك حتى لو كلك ارجعلك افلوسك اذا ما صارة

راح ايقنعك بأنو صارة ويجيبلك الف الف شغله اخذها من اخوك نصيحه وساير الامور طبيعيه ماكو واحد ميتعارك ماكو واحد ميصادفه شي

تحياتي

[اسرار الكون]

بعيداً عن اكو سحر عليكم فعلاً او لا ، فكلام هذا " الشخص " مو صحيح ! ولا تتورط بهيج امور ، ولا تخلي ابالك هالاشياء والشيطان يرسملك اشياء ع انها فعلا حقيقية .. المشاكل موجودة عند الكل ، ، ريح بالك اخذلك فترة نقاهه ابتعد قليلا افرغ كل طاقتك السلبيه ، استعين بالقرءان ،

ان شاء الله سعاده لقلبكم

[فقار الكرخي]

يعني على حجايتك
مبينة هاي سحارة مظبوطة

زين
اذا هيج متمكنة
جان سوت خير النفسها
مو تسوي سحر الواحد تخلي يتعارك وية اختة .

اما صاحبك ابو المليون ..
هم نفس سالفة السحارة
لو صدك متمكن بهاي الامور
جان سوالة فد طريقة جلب الرزق
او حسن وضعيتة من هو هيج بطل .

انطيني المليون الية
باجر عندي بناء

خل احجيلك فد سالفة صارت بية
بيوم من الايام بأحد المعارك ب2008
انضربت طلقة بصدري
ماردت امي تعرف . ضليت بالمستشفى الى ان شوية تحسنت
ورجعت للبيت
امي عبالها بالدوام باقي . المهم من احجي كوة
تصير نغزة قوية بمكان الضربة
ف 24 ساعة ساكت ما احجي
واحجي بس بالاشارة

على هالحالة بالبيت مدة اسبوع
وما احس اله عمي واخوية وامي
جايبيلي سيارة .
ولكم شكو
خل انوديك للسيد
بعد مناوشات . رحنة للسيد
يباوع علية واني صافن بوجهة
يسألني وكوة اجاوبا بأختصار كلش .
جان يكلهم بي جني هندي
جان اخرب من الضحك
كلهم يرادلة 3جلسات كل جلسة 500 الف .
زين ما اكدر اطلع من البيت اركظ
وامي تتقشمر بسرعة .
المهم كتلة اريد احجي وياك بأنفراد .
جان يكلهم شفتو ؟
بس حسني عرفتة جني هندي كام يريد يتفاوض وياية
طلعو بقينة اني وياه
كتلة شوف اكلك
ترة اداوم بفلان مكان .
ومتصوب وما اكدر احجي وهذولة عبالهم بية جني
شوفتة صوابي وكتلة ترة ميدرون
جان يكلي خل اسألهم واتأكد
صاحهم كللهم هم تعرض الحادث
او اطلاق نار او من هالقبيل
كلولة لا
جان يكلهم اطلعو
واني اعتذر منك وارجوك خليها سكتة
كلهم مابي شي بس مقهور على صاحبة مستشهد لاجني ولا هندي




ف يا خوية جيب المليون واحجيلك سالفة ثانية

هو راح يكلك وخرت السحر
انت من يمك كارزميا راح تحجي وية نفسك
ها اي اليوم اني كلش مرتاح
خلف الله على هذا وخر السحر
شوف حتى نفسيتي مرتاحة

اخيك انطيني المليون باجر عندي بناء

[حازم البغدادي]

ما علاقة ما ذكرت بالسحر؟ الضيق احيانا غير معروف المصدر بسبب تراكمات كانت مخزونة لا وعيك تظهر فجأة وهي تحصل لي ولك وكل الناس. الرانب ببساطة انتة تبذره وتلقي اللوم على على عوامل خفية بخرته واما اختك فالكل يحدث معه سوء تفاهم ينجم عنه مشكلة نتيجة لضغوطات نفسية واجتماعية ولانك تكابر واا تريد الاقرار ان التقصير منك رماه لا وعيك عا السحر نتيجة مخزونك المتوارث. كلنا نرمي اسباب اخفاقنا على عوامل اخرى لاننا نخشى اللوم والتقريع. فراجع نفسك وحاسبها سيعود كل شي الى نصابه. ولاتدع مثل هؤلاء يضحكون عليك.

[انثى مخمليةة]

هوو السحر موجود

بس مال تنطي مليون
يلا يخلصونك منه

هااي واكفه
لاتصدك كله جذب بجذب