يعطشان العشگ يل محد يشربك
وين يريد بيك الليل
انته وحزنك وگلبك
وين ليا غنه موديّك
يل محد مشى بدربك
وين يريد بيك الليل
تمطر محد يشربك
يعطشان العشگ يل محد يشربك
يبردان الوجوه النايمه بطرواك ما تشبه وجه ربك
يبو گلب المطر يا ليش
يا خنياب يا عازه
فازع للأغاني بضحكتك بعديش
گلبك بيش يتجازه
وحزنك بيش يتجازه ؟
اخذ حزنك بهيده لو خذاك الليل ما يحتاج تتوازه
وأخذ گلبك لربك والأغاني إمتاع
ربك يعشگ المتعوب
وإعبر والقصيده إشراع
ربك كاتب ومكتوب
الكتب قرآن يندل الحچي المكتوب والمرغوب
الخلق كل الجمال ونثر بيه حسين اكيد يحب سوالف عاشگ ومتعوب
سولفله السمعهن گبلك من الناس
ولا تثبت گباله روح بالوهواس والوسواس
وجه ربك مرايه لغربتك والليل من تزدحم بيك الناس
گبلك چم غريب اندله لو دلاه
وشرد من الحزن ناغاه
وأخذ بيده ومسح عيناه
ولعين الوطن وداه
ربك فاصلة سطرك التعزل ضحكك من الآه
وره ما ترجع من الله لشواطي الليل
شوف شلون صوتك يغلب الياويل
تغفى ويفز بيك الحيل
وتتحمل الناس بكل سوالفهم
وتتقبل جروحك والحزن والظيم وتغنيك بألوانك شفايفهم
ولا تلتفت للأذوك وره ما ترجع من الله تلگه گليبك يگلك ولا تهتم انته هواي شايفهم وعايفهم
فراس غالب
رد مع اقتباس
