مامعقوله تنسه اختك يبعد اختك!
ياعباس تزعل لون عاتبتك؟
عگب عينك الوذن واحتمي بيا سيف
وانت ا وياي طالت خويه سالفتك
يسالب مهجة اختك ليش عني ابطيت
وانت البكلايف عود خابرتك
معقوله تشوف اختك وتسكت من يضربوهه؟
معقوله تظل علمشرعه وخيامي حرگوهه؟
چنك مادريت اعله الهزل اختك يرچبوهه؟
بعد طولي يماي الگذله ياعباس
ياصل الرمل لوزرگ ماينجاس
هسه الناس ماتعتب لَّون شافتني هاي الناس؟
شمسويه وتظل زعلان وسكينه العزيزه الگوم بجوهه؟
شمسويه وعطاشه اطفالي خلوهه؟
واخيتك انه كلها الناس عرفوهه
ماراحو يگللولي اخيچ وين؟؟
ماگالولي عجبه اشلون اخت عباس تنشتمين؟
ماگالولي وين البيه بس تحچين؟
شو عافج ولاچن گال لحگوهه؟
هظيمه اتلفت ومحد يگوم اوياي
وين الغيره يهل الغيره عفتوهه؟
أَمر اعليك مچتوفه وتصد وتشوف
يعني يصير اخوي اعيونه طفوهه؟
اون وابچي وعلى امتوني يلوح السوط
وخيامي بلهيب النار حرگوهه
معقوله اعله مود الماي مارديت؟
معقوله جربتك خويه شگوهه؟
يخسه الماي واهل الماي شنهي الماي؟
دگوم وشوف اختك وين ودوهه؟
لون اعيون الك جاجدت من الغيظ
يعني اعيون ماكو ويعني صابوهه؟
ولون راسك يباري چا ثگب دخان
يعني الهامه ياعباس هشموهه؟
يعني يصير مثل احسين مالك راس؟
ومگطع وذر والجثه سحگوهه
هظيمه اتلفت ومحد يگوم اوياي
امشي اعليك امي الزهره بس لتگول
يخويه اچفوف اديك الگوم گطعوهه؟
العتب لله يماي العين وحدي اصفيت
يكفال الخدر الخدر واختك يهظموهه
انت اللي يسمونك كفيل ابهاي
هسه اختك كفيله الناس سموهه


الشاعر
كاظم جابرالسماوي

-----------------------------------------------------------------------------------------------------------------------------------------------------------
شل احوالهم عباس من صال
اعصار وحذرت من عنده الارصاد
اليشرد بي بخت واليعثر يروح
ومثل نافورة سيفه ايطش الاجساد
ابلظى حافر مهرته احتركت الكاع
وذرات التراب انكلبت رماد
ودرو بي جايهم واتحضروا ليه
وكبل يومين خوفا كطعوالزاد
طبو للملاجئ واحتمو خوف
وسئلتهم ركبهم من اجه شراد
واختلفو بسيفه حاد مو حاد ؟
طاحت روسسهم وتأكدو حاد
من ذاك الوكت عطاي المراد
طلبوموتهم وانطاهم مراد
كشفهم عالشريعه من التقو بي
مثل ماشاء ربك وانمحت عاد
عبرموقف العباس لحيسن
كله اعداد بيدي وشردت اعداد
لوما بالحسين محلفة الحسين
جاحسبة ثواني الدنية تنباد

الشاعر
أيهاب المالكي


----------------------------------------


أخوج انه عدل يازينب شتردين
ياهو الكال ميت ونصب فاتحتي
انا الوديت راسي على الرمح ناطور
حشاي تعذرت لوعفت ظعن اختي
امانة فاطمه يازينب الحوراء
من ذمة علي وندارت بذمتي
انا العباس اخوهه الماعفته تطيح
وهي نقطة حياء المافاركت كصتي
ظيفت السيوف بيوم جاع الدين
وانه العزبته بلحم خاصرتي
اسألو جفوف اديه شكثر ها ياسيوف
من فرسانهم جم سيف يتمتي
انا لعيون زينب ماغفتلي عيون
ولا غبت السيوف الحللت كتلي
البشر صلت فرض لاربعة عشر معصوم
وانه اربعه عشر معصوم صلتلي
عن ياميمنه وياميسره يكولون
حتى اشعر زلم عالكاع ثبتتلي
انه الكورته وقسمته ارباع
وعد ياسيف ملك الموت صاحتلي
جهنم من كثر شيل الجثث للنار
غصيت بجثثهم خبر ودتلي
وانا المدفون واكف ماطحت للكاع
دست طرف الارض والكاع كاملتي
انة المن علي بل كل علي بلازود
وقوتة البسمة اعلة الكاع نزلتلي
الشمس ردت لبوي وصله فرضه وكام
ولو رايد ترد هم جان ردتلي
بعدني بظهر ابوي وفاطمة الزهراء
شلعت من كلبه وكلب حطتلي
كتبت فوك زندي تعيش ياعباس
ومحروس بعلي الكرار كتبتلي

الشاعر
ناظم الحاشي
-----------------------------------------