محاورة طالب وطالبه بعدما تخرجو من الجامعه
محاورة طالب وطالبه بعدما تخرجو من الجامعه
الطالبه
مثل الحلم مرت اربع سنين
وهذا اليوم اخر يوم وياك
اذا بالبوكه باجر اسمع الصوت
بعد حسره عليه يصير ملكاك
من دونك بعد شيكضي الايام
مدري شلون اكضيهن بلياك
اذبل مثل ورده واوصل الموت
اذا ماشفت حل,وطول اجفاك
لوبيدي اشلعه الكلب وارتاح
واكلك لو رحت ..اخذ الكلب هاك
حال الصخره حاله ابين الضلوع
لا حس لانفس من غير دنياك
عودته عليك ,وادمنك شوك
اذا تمشي ويه دمه شلون ينساك
يامملوح يامحبوب الاطباع
سخي ربك وياك وكلشي انطاك
سمار وطول تلتذ بيه العيون
معقوله انت هم من طين سواك
وانطاني الولع بيك وهلتشوف
اتبع باقي عطرك واثر ممشاك
بعدك من يكلي الصبح لو جيت
صباح الحب ..عسل تنطقها بشفاك
انت هنا الي ,اهل ودفو وبيت
وبعيوني غرب كل ناسي الهناك
واحس ثلج الله كله بهمسك يذوب
ويطك خصري ورد لو لفه يمناك
ولك اكرب علي ياطيب الانفاس
هذا اليوم اخر يوم وياك
حيل انه ارد اشمك مثل غركان
شهكه وتالي اصيرن حصة الماي
انه بيا عين اودعك ياضوه العين
ومنك حتى اصبر ..شاخذ وياي
الطالب
احس مكسور كل مابيه مكسور
وكزاز الروح مدري شلون اطلعه
شبت الف جمره ابين الضلوع
وكل جمره فلا تطفيها دمعه
اذا مكتوب اودعج انه هاليوم
كلبي وياج لازم هم اودعه
محتاج اصدقائي واهلي والناس
يواسوني عليج وحزني اجرعه
بحصاد الزرع نخوه تفزع الناس
بحصاد الحزن هم يراد فزعه
سعيت وخان بيه الحيل مرات
وهاي اربع اسنين واني اسعه
واعدتج اجيب الشمس الج تاج
وصح تالي العد ماجبت شمعه
ايشيصد منهن اذا سيوف الوكت نار
فارس من كطن والورق درعه
يدارون الغني لو لاحه تقصير
الفقير عله الهوه يسووله قرعه
بلكت تنكسر عين اليعبرون
اذا فوك الحدود اكتبلي قطعه
اكتب هالوطن ورثلي الدموع
وعينك عينك انطه الغيري نفعه
كبل بس صوره اسبها وحيل ارتاااح
هسه بكل ركن خلولي تسعه
احس مكسور كل مابيه مكسور
كزاز الروح يجرحني من اشلعه
جبل همي وعلي واكف ومرعوب
وين البيه غيره ينطيني دفعه
رد مع اقتباس
