الحرب تحلف بروح الزين
ما تانيتني اكبر واشبع بصوتك
متوازي الوطن يتكشخ بموتك !
مارديت .. جا المن يتاني البيت
حتى يشم عطر بيبانه تابوتك !
ماكتلي الغياب ايطول من اسنين
وشوفت بزرتك لو كبرو تفوتك
ما كتلي الحرب تحلف بروح الزين
ماكتلي الرصاصة اتدور الينهاب
جا تانيت تشبر طولي يله تروح
بغيابك بويه كدر طولي جف الباب
جا ضميتلك شبكة طفل فحطان
من يتلكه ابوه بحلت الطلاب
مو باخر نفس .. باخر اجازة تروح
هيج استاهد بطاريك من ينجاب
يل مداري الهوه ..شداريت من دفنوك
لاتكلي امسحت عن الرصاصة تراب
من دنكت خلكك ولعبت وياي
ماكت بالحرب ما ادنك وتنصاب
ما لميت صوتك حتى اسافر بيك
من اشتاك اغاني لديرة الغياب
ماعفت بغرفتك لون وجهك جان
تسولف للسمار ال بالمرايه اشحاب
بعطر امي وبدلتك والرصاص الضال
وطن بالبيت عايف جنه مو دولاب
ماكتلي بصورك مستحه امي يصير
مثل الراجع وبهدومه عطر احباب
مو ذنبه الدرب بس انت طبعك ريل
ماخليت جنطة اعله السفر تغتاب
ومو كل اليفز بالليل حس بردان
من الشيلة شيريد محاضن الجلاب
زغيرة عيوني بس شفت الوداع وياك
كهوة وعزبت شياب وي شياب
وفاء الخفاجي
رد مع اقتباس
