ماني عليلتكم
ماني عليلتكم يهلنه والولم جـار وبگلبي النار
ظلت تشب وتنطفي
من دمعة عيوني
ياهلي شان العليله بالموده ايباشروها
وعلى فراش الولم بجفوف المحنه ايجلبوها
ما شفت گبلي عليله وبالفراگ ايلوعوها
بالولم روحـي اتمرمرت
يهلي او چبدتي اتگطعت
يا طفله مثلي اتلوعت
بالولم وفراگ أبوها
يهلي العليله يحافظوها من الاخطار وبگلبي النار
وآنـه بمصيبة كربله
يهلي تداووني
آه من الولم غثني ياهلي او روحي مردها
ومن تصد عين العليله للأهل يفرح چبدها
يا عليله المثلي چانت ظلت اتعالج وحدها
مفجوعه بفراگ الأهل
مصيوبه بسهـام الأجل
من يسبل ايدي اعله الأجل
يا هلي و رجلي يمدها
يهلي تراني اعله المنايه انزلت خطـار وإبگلبي النار
چني افگدتكم ياهلي
وانتم تفگدوني
ياهلي للمرض حاله اتهون بمصالح طبيبه
ويصعب التسعر جمرته إبگلب اليفارج حبيبه
فوگ نار المرض گلبي ميحمل نار المصيبه
نارين شعلت چبدتي
بفراگكم وبعلتي
أحّا يجمرة غربتي
لا تخلوني غريبه
وعيوني ظلت عالأجـل والأهل تندار وبگلبي النار
ما أدري يلفيني الأجل
لو أهلي يلفوني
يا هلي عني برحتو والگلب ما برح عنكم
جسمي مرهون الوساده او روحي مرهونه الضعنكم
ومن نزلتوا الغاضريه انگطعت الآمال منكم
بالمرض والفرگه انصبت
وما برت علتي ولا طبت
ومن زغر سني اتيتمت واگضي أيامي ابحزنكم
من يسعر بروحي الحزن متلمني الدار وبگلبي النار
والمرض خلانـي ابسجن وامگيـّده إمتوني
ياهلي للمرض شده وگلب طفلتكم حملها
وصابها سهم الموادع وسهم المفارگ چتلها
ياعليله ابتلت مثلي بالولم وإمصاب أهلها
أيوب مو مثلي ابتله
بالمرض وبذبحـة هله
ودموم أُخوتي بكربله
گامت اعيوني تهلها
دمعة اعيوني فجرت والدهر فجـار وبگلبي النار
وأتمنه نبلة حرمله
بيها يذبحوني
چنت أغط بالموت ساعه وانتبه وانظر عمامي
ترد روحي الفارگتني وأبره من رجفة إعظامي
وچنت أنام ابحجر أبويه وتستلذ عيني ابمنامي
فاتتني أيام المضن
عني جفن وي الضعن
وانگطع من اهلـي المظن
وظل عليهم جفني دامي
وظليت اناشد عالضعن واتطلب اخبـار وبگلبي النار
وين التردلي لهفتي
وبهلي يبشروني
على فراش الولم جسمي بالمدينه وعيني تربي
للطفوف وعالشريعه إيحوم على العباس گلبي
صاب عيني سهم عينه وبيش أوَچِّد بعد دربي
الله من سم السهم
نار وشعل بيه الولم
وحيلي تضاعف وانهدم واصبرت والبـاري حسبي
ظليت مرهونـة مرض والعقل محتار وبگلبي النار
واتحمس ابغربة هلي
البالدار خلوني
چني اتصور الطفله اتنازع ابحجر المنيه
إوتون من عدها المفاصل مثل ونتها الخفيه
والمرض نحـّل جسمها وكل ضلع حدره شچيه
والنفس نار من الوجد واسمع حنيني من الچبد
يهل الضعن نيته الرشـد
آ ينار الغاضريه
عفتو عليلتكم يهلنه والأمر صار وبگلبي النار
لو ما يوافيكم وعدكم
ما تعيفوني
چني ابحسرة الطفله من لهيب الگلب تصعد
وانگطع ظنها إمن اهلها او صدت الجدها محمد
اتصيح يا جد شوف حالي وهاك اخذ چبدي تمرد
يا جد تراني اتعلعلت
يا جد تراني اتيتمت
يا جد تراني اتحيرت
وانت أبصر بيه يا جد
يا جد تراني ما أهيـد إبليل وإنهار وبگلبي النار
ولا أهل عندي ولاعمام
اللي يباروني
للشيخ كاظم منظور الكربلائي رحمه الله
رد مع اقتباس
