طلاب السادس الإعدادي بما أنه الامتحانات قربت فتحتاجون شوية نوضّحلكم بعض الأمور حتى لحد يستغفل جهلكم، فهذا منشور مهم إلكم :
- شلون تأجل الامتحان من الدور الأول إلى الدور الثاني ؟
ج) لا تروح للأمتحان اصلاً.
- إذا اروح للأمتحان وامسح الدفتر عادي ؟
ج) عادي، بس إذا نيتك تأجل اصلاً فلا تروح لأن اذا رحت ومسحت الدفتر حيكتبون على نتيجة المادة اللي مسحت الدفتر بيها عبارة (صفر)، وإذا ما رحت اصلاً حيكتبون على نتيجة المادة إللي ما رحت بيها حرف (م) وتعني مؤجل.
- اكو بعض النتائج يخلون بيها حرف (غ) أو غائب ، شنو هاي ؟
ج) هذه فقط لطلبة الدور الثاني إللي أجل وما راح للامتحان مال الدور الثاني حيكتبون على نتيجة أسم المادة حرف (غ) يعني غائب ويعتبر راسب لان ما امتحن دور ثاني.
- يصير أسوي أجازة مرضية حتى أأجل ؟
ج) ماكو داعي ، لا تروح للامتحان أصلاً وتُعتبر طالب مؤجل ويخلون بحقل المادة الما رحت بيها حرف (م) ويعني طالب مؤجل.
- صدك ينقصون بأمتحانات الدور الثاني والتصحيح ظالم ؟
ج) ماكو هيج شيء، الدور الثاني حاله حال الدور الاول وله لجنة لوضع اسئلة ولجنة لتقويم الدفاتر الامتحانية.
- صدك إذا أأجل للدور الثاني ما انقبل مجموعة طبية ؟
ج) لا ، كلام عارٍ عن الصحة ، اكو جماعة دور ثالث وحالياً هم طلبة مجموعة طبية، وللعلم فقط طلبة الدور الاول ما يكدرون يقدمون إلا تخلص امتحانات الدور الثاني وتطلع النتائج، يعني تقديم الدور الاول والدور الثاني سوى.
- شنو أفضلية الدور الاول عن الدور الثاني لعد ؟
ج) الأفضلية هي : درجة عدم الرسوب، وهي درجة واحدة فقط تضاف على المعدل الخاص بالطالب الناجح من الدور الاول ولا تضاف بالنسبة للطالب الناجح من الدور الثاني.
- كم مادة يحقلي أأجل للدور الثاني ؟
ج) يحقلك تأجل كل المواد بدون أي مشكلة.
- اسئلة الدور الثاني صعبة ؟
ج) هذا السؤال يجاوبه الطالب نفسه، في حالة كنت ضابط منهجك ومضبط امورك تدخل للامتحان تجيب درجة كاملة وتطلع، لا تنسى الفترة الزمنية بين الدورين فكل ما كانت عدد المواد اللي مأجلها قليلة كلما زادت فرصتك بالتفوق لان المدة أكثر والمواد أقل.
رد مع اقتباس