بَيَّتت شَدَّة ياس
معكَودة بسبع بوسات
وَي شباج إمام الورد ، والحضرة هلاهل
والصحن رايات وبخور وضوة ، وادعيات وصواني نذور
وازنود جمَّار وورة كحل العبي امرايات زَفّة
ووآهلية بكل كتر للنالو امراد ، وإجو برداس
وجفافيهم البيضة حمام إيطير
وايطير الملبس
والحمام يطير
ودموع الفرح ترسم على إحجوله جناجل
والحرير الشام .
نام النعاس الحلو
وبَرَّد الحضرة
والخُضرة النديَّة
واشتهى المصقول كون ايموت
لوزه . إشتهت ليلة من البلابل
وآنا . ألم من ريكَ تين آخر الصيف
إسنين ألم
وسنين أكَطرَة
ووية الورد والهيل
وروايح فجر شمَّام
وبهوسات أجي من أول الشارع
تلاگيني المناير
والگبب بهلالها العالي وذهبها
ونَشرَت إضواياتها
وأگعد وأنيّم الياس بعبيرة الندي سبع أيام
احوطها بقرايين ، وصواني شموع
بلكي تنام
وأحسِّب للخميس اليجي
وأنتظر وأظل محتام
يا ساعة تغيب الشمس
وإنتَ إتهل
مشاعل ضوه إتدِكَ بابي
وأخاف من الحِسن
واجفل
إو وراك إيزفك البستان وايهلهل
إو وراك الفرح بمواكب ترف اعلام
وأگِل للعصر
بيده إيجيبك العتبة غرفتي
وواگف آنا اگبال المرايات
أشيلن بيدي شَدَّة الياس
ومن تگبل
أرشگ بيها إمن إبعيد
وأبوس إمنين ما بَلِلَك ريكَ التين
ومَي الورد ، والشمّام
وأفرفح بالبجي من الفرح يَحبيّب
وأظل ما نام
أظل أيام ساهر
وانتَ ريحانة بسريري إتنام
رد مع اقتباس
