گصدنا للمضيف الضهر جوعانين (قصيدة تراثية)
من شعر أهلنا في الجنوب ومشايخ الجنوب الاصلاء وهذا
من طرائف الشيخ ثامر حموده ال مزيعل زعيم مشايخ بني حسن في ذي قار.
كتب الى صديقه الحاج عبد العالي طاهر رئيس عشيرة بني سعيد في الكرمة . والذي اشتهر بالكرم لدرجة انه في بعض الأحيان يقوم بنفسه بخبز الخبز للضيوف واصلاح ذات البين . مداعبة يصوره فيها وكأنه بائع للطحين متخذا جانباً من مضيفه دكاناً . داعبه مع يقينه بسعة صدره وعلو جنابه وسمو تفكيره.. يگول
گصدنا للمضيف الظهر جوعانين
لگينه الشيخ متحزم يبيع طحين
***
بيده المگطع وجدامه الميزان
او لابس للشغل دشداشه نص اردان
والتمت عليه چومة من النسوان
يصيحن فدوه الطولك تره عجلين
***
طيوبه يگلها شويه تانيني
او حسنه يضحك الها وگال من عيني
او شتم نوفه وصرخ طشرتي اطحيني
اوطرد دوخه ويگلها السره لحسوني
***
يربي صمه ابصمك من الحاسود
او عسا عين التحسده يو رمد يو عود
وزن مضبوط وزنه اولا عليه منگود
او من يوزن اسم الله اعليه عين ابعين
***
حجي وخايف الله او لايعرف ايخون
حمولة اهله وفريضه يعجل المجنون
اله ثلث الگلاطة وخوش عنده افنون
او حلاة الولد من خاله چسب ثلثين
***
امس وانته گليط ويرد ليك الشور
مضيفك حبل طوله والدلال تفور
ترسته طحين نمرة صفر يامسطور
اللحد طمك وطم باجي الگطاعين
***
نفعك والتبوگه اربعطعش دينار
مكدة شهر ماتسواش هذا العار
لونك سكن بين الناحيه والطار
اولا كالساعة تتمعطر بجيس طحين
رد مع اقتباس
المشاركة الأصلية كتبت بواسطة انثى مخمليةة
