امي كلش صافيه // امي هيه العافيه
ومن تغمض عيونها // انه اموت بدونها
************
امي طيبه وتحلف الناس بختها
امي واليشبها بس امي شفتها
امي جم مره بحياتي تعبتها
وصوتي عليته عليها وزعلتها
اتكلي روح امسامحه // وهاي لجلك طايحه
ام هله ايسمونها // انه اموت بدونها
***********
امي ما ادري شسولفلك عليها
امي ضحكتها اختفت من كد بجيها
امي طيبه وما ترد الي يجيها
امي جانت تفرش افراشي بديها
جانت اتغطيني // امن ابرد ادفيني
التعب هد امتونها // انه اموت بدونها
*****************
البيت اذا ما شوفن امي ايصر ظلمه
صحت الله ابعون كلمن يفكد امه
امي يا بعد الهوه الكل لحضه اشمه
امي موزونه وحجيها كله حكمه
كمت اشم اثيابها // واكعد بصف بابها
الوكت دوم ايخونها // انه اموت بدونها
***********
كلمت اليمه تره ماكو احله منها
امي ممزوجه المحنه وي لبنها
امي من امرض جنت يسهر جفنها
امي يعكوب النبي احتار بحزنها
يم سوالف مالحه // شو اشوفج رايحه
هسه روحي اشلونها // انه اموت بدونها
***********
من سبع فدوات امي اندار الها
امي بالدنيه وعلي ماكو مثلها
الله خله جنته جوه رجلها
كمت من اجهبها ما ادري شكلها
الخبره حلوه امن يدها // وانه اعز اوليدها
وربعي ما ينسونها // انه اموت بدونها
************
امي جانت تكعد بكل مغربيه
اتفرع الشيله بدمعها وتدعي اليه
جنت من اطلع ترش الماي هيه
امي حته امن الهوه خافت عليه
اشلون امي انساها // وعمري عشته اوياها
لمن ايدفنونها // انه اموت بدونها
***********
رد مع اقتباس
المشاركة الأصلية كتبت بواسطة زنـہوبـہهہ
