بالصحاري تيهت . خويه لن بيك اعثرت . طايح اثاري اگبالي
گمت اشم ابرگبتك . واعرفت من ريحتك . انته الحبيب الغالي
معقول هذه انته . المساع حاضنته
خويه من حرگوا خيمنه تيهيتك
واركضت بين الصحاري او شاهديتك
وذره وذره طايح امخضب لگيتك
ابلايه راس ابلايه ايدينك رأيتك
خويه يم جسمك طحت . واعله صبعك دنگت . او شلت الصبع بيديه
گمت اغسله ابدمعتي . گلت اضمه ابشيلتي . خوفي تشوفه ارقيه
بدموع غسلته . المساع حاضنته
ماعرفتك خويه اول مانظرتك
ما اصدگ انته مساع الشبگتك
وين صدرك وين يالغالي رگبتك
ضحكتك وين اللي مرسومه اعله شفتك
وين ضحكاتك اللي . وين خويه اتدللي . ماتت ترافة روحك
ليش عطرك بالهوى . مات وي روحك سوى . والباقي عطر اجروحك
ياريت ماشفته . المساع حاضنته
_
ليش صدرك ويه گاعك سوى صاير
او ليش صابيعك هذن مابيها اظافر
ليش فوگ اضلوعك اتنام الحوافر
ليش بس ابجسمك ارماح او خناجر
ليش عاري ابلا هدم . ليش صدرك منثلم . متكّسره ليش اعضامك
ليش مابيك اي عظم . سالم او ما منلچم . او مگطوع ليش ابهامك
عالگاع شاهدته . المساع حاضنته
_
خويه عشر اخيول متعنيه احسبتهن
ايروحن او يلفن على صدرك شفتهن
آنا لو يمك چنت چا وخرتهـــــــــن
ايرظن ابجسمي ولا جسمك ردتهن
إمن الصدر شفت الضهر . جسمك اشگد بي حفر . اتراب او رمل ممليه
لونك امغيره الشمس . تلچم ابجرحك واحس . يالغالي جرحك بيه
مجروح بالسكته . المساع حاضنته
__
خويه كل خوفي جرحتك من لزمتك
چفي حار إمن الجمر واعرف لچمتك
گمت اتوضه ابجمر حين التركتك
جدمي بالنار امتله او گوه وصلتك
جيتك الك تعرف ركض . او مابقى ابگلبي نبض . لمن لگيتك دامي
منذبح وكت الضهر . او فوگك اتراب اشكثر . ياوسفه ميت ضامي
والماي ماضگته . المساع حاضنته
____
سكنه ياخويه او رقيه ضيعتهن
ايركضن آخر مره بالطف شاهدتهن
والشمر يركض وراهن واتبعتهن
گتله كافي امتونهن مو ورمتهن
ابسوطه سكنه امچلبه . اتگله متني اضربه . وارقيه لا تضربها
طفله لا ما تحتمل . سوطك او هذه الحبل . عذبني لتعذبها
يسبون ببنيته . المساع حاضنته
رد مع اقتباس
المشاركة الأصلية كتبت بواسطة @مريم
