رحت من گتلك تعال بفيضهم تغرگ عيونك..
من گلتلك وادمك موسم حزنها يبوگ لونك..
جفنك اليخفگ گلتلك للكحل مو للدمع..
وحدك خايف تموت
وباچر دموعك تصيرلك چفن حال الشمع..
أمطر أحلامك بروحي
تخظر شتالك شمس عيد ولعب ..
صوغ من سعفك گلايد
فرفح بريحي يبو گذله ذهب ..
عينك ارطب لاحك وجفهم يجملها التعب ..
ورحت گاودت الچفوف
الفرهدن طولك حطب..
شوازة طولك طحت دمعه
مو گلتلك لاتصير بديرة العميان شمعه ..
الشمس باكت شوفهم لا تنزف جروحك ضوة
وانه تذكر كبل لاهيس خنكتك
من تعب غرگان اجيبلك هوة..
تعطش شفافك ضحكها وجنت ازف جروحي ماي..
جم فرات التم واجيك وترتوي
وانه بضماي..
ضيعوك وتهت لنته بهورهم رگصتك نسمه
ولنته للمنكوب ناي..
يكبر بصدري الحزن لمن تشح عنك ضحكتك ..
وچملوك شجم شته الشافوا دمعتك..
وسطرة سطرة چفوفهم صوفرت حلمي
التوة راد بعيني يخظر ..
موكلتلك هوسه چفوف ومناجل
لاتندك طولك اشگر..
ليش جفك شكك احلامي البديه
ولانه حاضي بتاج وصلك
لانته لقرءاني راكع..
وليش ادليك اعله دربك
وانه ضايع..
من فراتي التم عليك شمال گمريتك نستني..
ضمني لمرايات روحك كذلة حديثه كلتلك
وألمتني..
وعادي لو مالي نفع وصله قماش گبال بابك ..
خذني لو دخان منسي بسد ضبابك..
ضمني ليل لعينك بشحت المكاحل..
خذني سالوفه اعله أخرس
راضي اموت بكلشي قابل..
موش صبير البروحي..
وروحك حجايات غيمه ويبستني..
وليش وازيت الحمام اعله الرحيل وكلبي غار..
والفراغ البين اصابيعي انسه وكاودت نار..
رد يتالي النار اليه..
بسعف يتلكاك كلبي
بسعف يتلكاك دمعي وكلشي بيه..
خضر بروحي بعد منك عرك مضموم بيه
سجاد السيد هادي