هنا

[الشاعر هاني حماده]

حيث يقول بطل القصه الشاب
شاب و شبع لوعات و هم طلع شيبة .... والفرح عنة بعيد و بلا حبيبة
فترد عليه إحدى الشابات
طم روحك بسرداب والطم لطم ميت .... كل ربعك مكبلين بس انت ظليت
الشاب
هم ردت أطم الروح بسردابي گوة .... بس شفت فارة و فار بالختلة جوة
الشابه
تتغازل الفيران وأنته التباوع؟ .... مو بس تطم الروح دكها بمدافع
الشاب
هم جبت مدفع زين گلبي ارد أهفة .... بس شفت قنبلتين شفة اعلى شفة
الشابه
جانت تعوزك هاي ,حب القنابل .... ما تگلي حظك ليش وياك قافل؟
الشاب
ما اريد أهيج جروح خل أمشي أحسن .... وأبعد بعيد هناك و بروحي أسحن
الشابه
لا عمي لا هيهات هاليوم أعوفك .... خليني أمشي وياك وأفهم ظروفك
(وينهض الإثنان ويسيران معا تاركين المجلس)
الشاب
بس مشيج انت وياي ما بيه دواية .... سلعة و لفظها السوگ ,گلبي و هواية
الشابه
خافن عليك تروح تلبسلك حزام ... و بواحة العشاگ اتفجرة وتنام
الشاب
مو ذنب أهل الشوگ ماعندي محبوب .... يجوز بجهرتي عيوب ما أنحب فرد نوب
الشابه
عمي الزلم أخلاق مو بالمظاهر .... و گلب البنت مفتوح للگلبة طاهر
الشاب
كل ظنج ألگى گليب يخفگ لملگاي .... وبشوفي يفرح دوم و يگلي ياهواي
الشابه
الگلب بالتشريح تشوفة نصين .... نص لمسير الدم و نص للمحبين
وكل إحنا عدنا نصاص هم اله ثاني .... ولابد ينول الحب كلمن يتاني
الشاب
يابة شكثر تانيت گربت أأيس .... وگلبي الخفگ من جان البكر ريّس
بس والله هم معقول حجي الحجيتيه .... اشگلتي لو تبنين گلبي و تسكنيه؟
(هذا صاحبنه هسه يلا طخت عنده.....)
الشابه (وقد إنشلع قلبها وشاب شعرها....)
لي هسة ما حسيت وك آنا أحبك .... و من طلعن الشيبات و آنا اعلى دربك
ونشدت گلبي اعليك گال انت حباب .... بس رادك تناغيه حتى افتح الباب
الشاب
فكرت بالتفخيخ وبطمة السرداب .... ثاري الأمر محلول وي دگة الباب
بس انتي حلوة هواي وآني قدي و عوع .... ولو شافت أم وحام وجه العلية تزوع
الشابه
شلّي آنا بأم وحام و شلّك معاها .... إنت شريج الروح و ميها و ضواها
الشاب
گلبج صدگ وياي أفديلة گلبي .... و خل تسمع العشاگ بس انتي حبي
الشابه
و بواحة العشاگ سجل إسمنا .... نحجز مكان هناك و الحب يلمنا

[نصرالدين البلداوي]

جميل جدا
عاشت ايدك