من تغيب روحي تغيب
ما الگاليي أثر مني..
وأظل لوحدي مثل الطفل
بس الدمع يندلّني..
ومن تسافر الضحكات تصعد بالقطار وياك
وغيوم الليالي السود تآكلّني..
ومن تمشي القميص يطير فوگ الناس
وسطوح البيوت العالية تغني..
ووحگگ عازتك عازة..
مثل مسجون من يشتاگ لاعزازة..
گبلك ما اتوازة لناس
بس لعينك اتوازة..
يأول بشر دافن رازقي بروحة
ويلون التين فوگ شفافك جنازة..
يل العيونك مدينة من المباني السود.
وزلفك ناس تمشي ملثمة بباورد..
وعلى خدودك يطعم التوت
مدري شچم غصن ممرود..
يل تمشي بچدم طاووس
وآني أمشي بچدم مگرود..
من ترمش عباية من الگحل
تنزل على عيونك..
ومن تضحك عشيرة من النجم
تطلع من اسنونك..
ومن تمشي الشوارع
تمشي كلها وياك وبدونك..
أنه بدونك..
أظل مثل الحمامة الما لگت عشها..
يبّست روحي يمتة بشفتك ترشها..
جمعت سنيني صوغة عيد وانت براحتك طشها..
وهي الروح متغشها الليالي السود
بس زلوفك تغشها..
ولا الومك
حقك ما تشيلك گاع
اذا هو الكمر يطلع من هدومك..
اذا هو الندى يختل بزردومك..
اذا هية الشمس لو غابت تلومك..
على چفوفك السنبل ضاع..
وگذّلتك سودة مثل الليل
بس صارت لدمعي شراع..
و نهر من غيم يمتد
على زنودك گاع..
آني أول بشر متعوب
وأنت أول بشر نعناع..
#ادهم_عادل
رد مع اقتباس
المشاركة الأصلية كتبت بواسطة فقار الكرخي
