هنا

[الشاعر هاني حماده]

وردة

شفت..
ورده ازهرت
مابين عاگول
تمد رگبتها لخيوط الشمس
تحلم..عمرها ايطول
لچن هالشوك
آه ...الشوك
خنجر حسد..مسلول!

نسمة
شفت..
نسمه ابلهب آب
ردت منها عشگ
ماضَّيع احباب
صعد دم ابوجهها
وسدَّت الباب !

حمامة
شفت..مره
حمامه اتلوب
انشدتها عن حزنها
رادت اتذوب !

صمت
شفت..
فيض السكوت اشكال
گطره وساجيه,
ونهر وبحر وآمال
وشفت آخرعشگ
چتال !

خوف
شفت..
وجه العشگ..خوّاف
تحيا اشفاف لشفافه
وتموت اشفاف
لچن...خوّاف
شارد من ملامه ابعيد
لاعنده إذن سمعت
ولاعنده گلب شاف !

حرية
شفت..
طيره..تخاف اتطير
انشدتها- اللعب-
السمه وسعه
ونوم القفص..تكسير
گالت لي:الجنح
هذا الجنح لليوم
هم مشكول
هم ازغير !

حُب
شفت..مره
گلب مذبوح
ضميته اعله صدري
اسمعت آخرنبضه
بآخر اغنيتها اتبوح:
حبيبي ياحبيبي
العمر فدوه ايروح إلك
ياروحي
فدوه ايروح !

حلم
شفت..مره
حلم ..يبجي
گتله إشبيك ؟
گلي :اعيون احبها ابعيد
سكتت
مابعد تحچي !

اصابع
شفت..مره
اصابع مريم
اشموع
مسيت الاصابع
گامت اتموع !

ممنوع
شفت..
بالبار..أبعد صوت
مسموع
وقطعه امعلكه اعله
الحايط
تفيض ابحزنها..ادموع
مهظومه
انكتب بيها :
( الغنا اعله الناس ممنوع)


شاعر
شفت..
شاعر..
مطر..دربه
يضم اسراره بعيونه
تروح
اتفيض من گلبه !
رسام
شفت..
رسام..
يرسم بالعذابات
چفه إحجار
وايامه إنتفاضات !

خجل
شفت..
اعيون
لورمشت خجل
تعمي .
وشفت..
إخدود
لوضحكت شمس
تدمي
وشفت..
إشفاف تسكت
لوحچو ب اسمي !

صلاة
شفت..
آخر صلاة الروح
لعيونك
وشفت..
حسّاد من يومين
چانوا من تمر تضحك
يزعلونك
مدري اشلون
غمضة عين..
فتحة عين..
صاروا همّه الاحباب
ويعبدونك !

ضياع
شفت..
هجر المحب ..سِلْ
وعذاب المچوي
ب الظِلْ
وضياع
الماحظه ابخِلْ !

[انثى مخمليةة]

[نالين]

يسلموووا

[فقار الكرخي]

تسلم ايدك