أمي والسفر
ياسفر
گلب امي نجمه
ضَّوت الليل الطويل
ياسفر
ندمه إبتعدنه
وظل جرح بينه الرحيل
ياسفر
گمرة وطنّه الغالي تبعد
والبيوت ابغير اهلنه
اشلون تسعد ؟
نهر وشراعك دليل
ونجمه
گلب امي الحزين
ضوَّت الليل الطويل
ياسفر
گلب امي شجره
يغفه عد فيها الحمام
وبيت من الطيب چفها
وكل اغانيها سلام
بيها من الوحشه
دمعه
والدمع بالسهر
شمعه
تضوي ياعين التنام ؟
وشجره
گلب امي الحنين
يغفه عد فيها الحمام
ياسفر
گلب امي نهرين
وشموس
چانت ابطيبة نفسها
تحلم الروحي ابعروس
تضوي كل البيت
فرحه
وگلبي المالوم جرحه
ابظِل محبتها يبوس
الورد
بشفاف العروس
ياسفر
گلب امي مثلك هم سفر
بس بالحنين
إنت من تزعل..مسافه
وهيَّ من تزعل ..تلين
ربي..خلها ابعافيه
شمس حلوه وصافيه
وأشجار تين
واطرد الشر
والمرض عنها
ابورود الياسمين
ياسفر
وجه امي أطيَّب
من وجه
أطيَّب حبيب
إتغيب شمس الله
وگلبها
إشموس
ماتفعل تغيب
أدري بيها إمجرّحه
وأدري بيها اهموم
ممتليه عذاب ومستحه
ياسفر
لاچن خذتني
الهجره لبعيد , السنين
لسه تذكر
بوسه
من تذكرها روحي
ابغربه
يخنگني الحنين
ياسفر
ماتعرف اشموسي
محطات وحدود
باچر
اتصحِّي سمانه
وگمر
ع البصره نعود
انغني كل احلامنه
البيها طيب ايامنه
وطيب الورود
انبوس طبگتنه ونهرها
وتنكسر كل القيود
ياسفر
گلب امي وهوَّس
گلي هم گالت خذوه
يمّه
خافن ع النهر
ميِّت لگوه
لو انذال الشارع
اتعدَّوا عليه وعذِّبوه
لومثل ماگلي مره
من اعلى طابق
عامل ابظلمه رموه
خايفه
وداعة حنيني
وشيبة الراس
العلى ارباته ضِّوت
ياسفر ل امي سلام
گلها وعيون
اللي عالذِّل ماغفت
إبنچ الآخر محطه
شمس سمره
وماطفت !
رد مع اقتباس
