شاعر من ميسان
ياغبشة نده الوجه الورد والياس
وياحنة امراد بوجنة السدره
ويانسمة ضوه برية مسية غروب
وياجلمة علي بشفايف معسره
يالبريح العتب شجرة حيه اتصيرين
ويطيح الورك كطرة خجل صفره
بلونج نيتج ومغمضه من تمشين
على عيون المحابس نيتج شذره
ريحة حنطة اشم بسوالفج مرات
لأن حجيج لذيذ وجلمتج شكره
اردلج يافضل حته استقر وارتاح
وانتي الكل نهر بعروكي الج مجره
كبل لا اكولن اخ اسم الله يمه الكاج
وتطيحين اعلى صدري مناشغ وعبره
يالبونتج دفو يذوب الجرح لو هاج
دفو ونة ربابه بصفنة الصحره
وعينج بالضبط جن حب صريفة هور
يبجي وكطرة تبقه اتسلم لكطره
مامش كل فرق بينج وبين الناي
هم مثلج ينوح وحسرته بصدره
على خد شيلتج غافي الشرف جلاب
وضخن في عفتج غافي الستر حدره
مثل فطرة السنبل لمن تعزبين
لحلوك المناجل يكرم بنحره
يضكني بهندسة ليل الصبر نوبات
ولنج كاشخه بثوب الفرج كمره
لروجة ضحكتج شاطي الفرح مشتاك
تضحكين وعرض دمع الحزن صخره
مثل طشت النجم حسباتج اتطش نوك
بصحره الليل وعيونج سهر تبره
علمتيني اكابر واصبر وما اطيح
ومن طبع الشمس كلتيلي اخذ عبره
ينذل النهار الشمس من اتطيح
وبخنجر المغرب ينطعن ظهره
ياسبحة يسر بيج الوصف محتار
يقينن جنتي سبحة فاطمة الزهره
رد مع اقتباس
