اخطبوط الدنيا فنانة حرام
الدنيا مهره والغرور اسراجهه
ويامه چانتلي تجي بديباجهه
جلد گلبي وبهواها ما يذوب
لا ولا عيني هوت مكياجهه
الورد عطره يفوح موحاجه دليل
روحي كاروك الشرف منهاجهه
الطلك الدنيا حمل راية امام
شرف الهه الجنه يلبس تاجهه
الدنيا مني باگت اورود الربيع
شيبتني وشيبي عاف ادراجهه
بعيني دمعه لو جرت يصفن اليل
لله تصعد والحزن معراجهه
عندي صوره الصور منهه شيبت
وموعجيبه الصوره خرسه لوحچت
لون وردي ماكو بيهه ولا خضار
بس سواد ولون ابيض للتخت
عفيه دنيا اشگد صليفه عيونهه
ماصخ الزاد بطعمهه وماحلت
على جروحي تلعب وتتعبني حيل
جنه عدهه شما حوت وشگد جنت
عيني عينك هيچ اشوف الدنيا هيچ
اتبات شبعانه وانه جايع بتت
سايه هدهه البوك من جيب اليتيم
واليتيم اجيوبه كلهه تيتمت
لشوگت دنيانه تبقه بس تبوك
غيره ماعدهه ولا ذمه وبخت
الدنيا عدنه خلفت دنية فشل
مستحاها طايح بحجر الدجل
احساس ماتملك ولاتملك ضمير
صوره طبق الاصل مضروب المثل
اخطبوط الدنيا فنانة حرام
اتمثل ادوار الترافه والامل
عدهه هينه الدار لو صارت دمار
وعدهه هينه الشمعه طفاهه وجل
وعدهه هينه الحره لو سكنت رصيف
المهم كرسيهه ميصيبه الشلل
واضحه الاسباب موحاجه بيان
الدنيا شجرتهه خبيثه من الاصل
براس راعيهه علت بس ماعلت
نامت بكاروك مفضوح العلل؟؟
على كلن راح اعوف اجروحي
وراح انسه الي بديته من كلام
وعن لسان الحال اسولف مبتسم
وخلي گلبي غارك بشاطي الغرام
لان مفروض الفرح واليله عيد
وفرض هذ العيد من فرض الصيام
ولان هذ الشهر شهر الله العظيم
هينه نور الله يجي بهيىة امام
راح اغني بعيد ميلاد الحسن
وحيل اشد الفرحه بجناح الحمام
وللبقيع ارسلهه محفوفه بصلاة
عالرسول واله وصحابه الكرام
****
رد مع اقتباس
