عاشك حروفك امامي عاشك حروفك
وروحي اباب امنياتي ضلت اتطوفك
انت يا اجمل حـلمها الـرايده تشوفك
عاشك حروفك عاشك حروفك
........
يلي وجهـك ضوه عيني نور دروبي
انت كل عقـلي وكياني انت محبوبي
تدري من دونك اعاني محبتك ثوبي
انت يمعـلمني اتوب وتـمسح ذنوبي
انت يالتـعـرفـني كًلي وساتر عيوبي
لحظة ما اعوفك
وعاشك حروفك
........
بعشكي ذوبني هواك الشوفتك ذايب
انت موجود بحياتي لحظة ما غايب
يلي تـوبتـني محبـتـك انحـسب تايب
كًلبي من زغره تولع بالعشك شايب
بروحي بانيـلك امامي معبد وراهب
الوحي بطيوفك
عاشك حروفك
..........
الك يالمالـكـني حبك فـوضت امري
تعلم بما اخفي واعـلن تعلم بسري
فدوة الك محبوبي كلها ايام عمري
البيه مو دم بعروكي حبك اليسري
هذا مو كًلبي الينبض انت ابصدري
عايش الشوفك
عاشك حروفك
..........
انه لو ما اشوف وجهك شلي بعيوني
وانت محبوبي وهـواك مـزيد جنوني
انت يا لـوحة حياتي منظري ولوني
انت شربي انت زادي انت ماعـوني
وبيك مامره بحياتي خابت اضنوني
تشبع ضيوفك
عاشك حروفك
.........
مهدي يالوحدك احبه ما الك ثاني
انت عاطفـتي حنيني انت وجداني
اسمك معلمني احجي يلهج الساني
وهذا كل خير العـليه جفك انطاني
انت ياصومي صلاتي اول ايماني
بيه مغروفك
عاشك حروفك
..........
الشاعر
اياد الفرح التميمي
رد مع اقتباس
