هنا

[مصطفى جاسم البديري]

قصيده متروسه صور شعريه واحساس جميل

اجذب لو كلت انساك مااكدر
حته الكلمه هي بحلكي تتكسر

كلبي الماقبل انساك لحظه بيوم
مثل الميل حبك بالكلب يفتر..

من اشوفك كل جرح بالروح هو يطيب
السيف بلا غمد معذور لو زنجر...

يا يوم النوارس ماتحب الماي
من يعطش نهر اجروفه تتفطر..

الدنيا بلا شمس ماتنحمل يومين
شلون اكدر اعوفك انته وتصور

مو شرط العله بعيون ناس اجبير
الطير اشما عله ايبين تره ازغر...

الشجره الما بنت بنصها عش عصفور
باجر هيه تندم وعليه تتحسر..

من يذبل ورد صوج الندى والماي
الخريف شكد حلو وبي الورك يصفر....

نبع صافي اشوفك تروي كل عطشان
يا بسلم جروحي بيه العشك اخضر

جم مره اشتهيتك وانته ما موجود
احضنك صورتك طالب حضن دفتر

الضريح الما يشور ما تهابه الناس
يظل محد يزوه حاله حال البر..

اريد وياك ارحل يم شواطي الشوك
وارسملك ضحك ابريحه العنبر ...

جفوف الاعمى هنه عنده هو عيون
ولسان الاخرس ايده هو لو اشر...

جر روحي بمحبتك عادي هيج ارتاح
الدلو بنص بير تدري يعيش من ينجر

خرسه الكصبه عاشت هي وسط الهور
صارت ناي هسه حقها تتكبر...

من يبجي النهر لا ما يبين عليه
ما خلي غيابك عليه اني اثر...

من طاح الندى صاح الورد افيش
ومن طاح المطر شفنا الزرع خضر ..

بلايه حروف هيه وتنقري الساعات
هيج اقره الوجوه تعرفني اني اكدر....

احب كلبك لان يشبه تره الجمار
مثل لون الكطن لا هوه بعد اكثر...

افز فزه الضوه لمن يمر طاريك
الوطن كلشي بحياته هو التأسر..

عزيز انته عليه بيك المحنه اهواي
صح هوه خشب بس يرهب المنبر ...

يمدحونه شكثر السيف بيد اسباع
ويذمونه شكثر جي يغدر الخنجر...

شبابي ودنيتي فدوه الك يرحون
منعوفك تدري لحظه ابظلي اتعثر...

الشاعر مصطفى جاسم

[انثى مخمليةة]

قصيده جميله

شكراا

[فقار الكرخي]

تسلم ايدك