وي الوكت عندي حچي ما ينحچي
بس شسوي الدنيا تجبرني وتلح
راح اسولف وي وكتي من الصميم
بلچي يسمعني الضمير ويصطلح
الدنيا ظلمه والوكت شارب نفط
ولو قطرات النفط صارت تشح
لان باگوه الجماعه من زمان
بوگه شرسه والوكت عدهم مرح
وباگو وياه الأمان وشي عجيب
النفط تنضح عينه ويعاني جرح
جرح من شله بسياسه فاسده
بيهه ما غزر الزاد ولا ملح
بالبلد فرهود صاحو والبلد
جروحه خضره والمعاج ما يصح
يا ألف وسفه على هيچي زلم
خلوا دموع الوطن دم تنسفح
ياوكت ؟- ترجوك ردني ليوره
العهد طاغي الدوله أبو وجه القبح
خل اسولف عن قيادة دولته
شلون چان البعض باطحهم بطح
چان بس يشيل أيده للرفاق
يصير واحدهم طلي وينطح نطح
وچان من يدير عينه ابن الحرام
چلاب حزبه ياوكت تنبح نبح
تخبص الدنيا أذا يخطب خطاب
يعني زعلان المطي من المقترح
وتدري حزبه شلون يصبح لو زعل
مثل واحد اثول ويركض صفح
وذا يلگه واحد وضده اشتغل
هذ لازم لو جبل يصبح سفح
هيچ چان الطاغيه يقود العراق
طاغي أجرامه صعب ما ينشرح
بس رغم كل الجره بعهد الطغاة
تشوف متساوي الضعيف وي الوكح
عنه احچي يا مصيبه شرد اگول
نار حقده أعلل يضده تنجدح
شاهده أعليه المقابر والدماء
بصور ضلت خالده ما تنمسح
يا وكت ؟- أرجوك ردني الهل وكت
وخل اسمك يا سؤال المنطح
من السؤال الدار كل شعب العراق
بالخساره دوم ما حصل ربح
واكف استعداد يجرع بالصر
ينتظر واحد يگله استرح
اضن تدري يا وكت شنهو السؤال
وتدري سيفه شلون ذابحني ذبح
راح اسولفلك سوالف ما جرت
تگعد النايم بگبره الطير تكسرله جنح
وراح أخبرك بالجواب وأستريح
وخلي باچر راسي ينشال برمح
ليش ما صح واحد يقود العراق
شنهو قفلت والقفل ما ينفتح
شنهو ضاع الشرف ويا أهل الشرف
والمحسن راح بس باقي الشطح
مو ألف واحد صعد للبرلمان
والجماعه العنده تردحله ردح
ياوكت مو حزب واحد عدنه صار
عدت الألفين صعدت للسطح
كلمن يفكر بحزبه وغايته
والبقيه الوكت قارحهم فرح
وفوك كل الضيم ساستنه تگول
لا أمان ولا سلام يصير من دون الصلح
يعني وي چتال أبويه امشي سوه
وانسه أيام المضت ومشي سرح
يعني انسه ياوكت جرحي وأموت
وثاري فوك تراب گبري ينسدح
شلون تقبل ياوكت حقي يضيع
وهيچ اعوف الباگه صدره منشرح
ياوكت ؟- أرجوك لا تسأل بعد
المسئله صارت كسر جمع بطرح
الشعب رايدله انتفاضه من جديد
بيهه يرفع علم عال وجهه چلح
لان باقي الشعب بجروحه يلوب
وبالأمل عايش يطر وجه الصبح
رد مع اقتباس