ليش نشّفتي الندى النايم على اشفاف الغرام
طول عمري
نجمة يحصدها السهر
وطول عمرج وردة ذبلانه بسنادين الظلام
ليش نشّفتي الندى النايم على اشفاف الغرام
ليش سدّيتي نزيف أيام عمري
لأن چان يريد يرسم لوحة بالدم
لوحة تغتالين بيها الشاعر وصوت النوارس والحمام
ليش طفيتي جمر ثورة جروحي
خفتي تخسر كل شياطينچ بمعركة الإمام
ليش ما حرّكتي بيّه ارماد روحي ..
وضگتي گلبي
وضگتي طعم الدمع والماي الحزين
ليش ما شمّيتي دخان الشتا وريحة الطين
انا مو شاعر غزل
تنغر عيونه ..
برگصة الصياد وسهام الريام
انا شاعر وجهي بيْه كل ابتسامات السما
وحزن الجنوب
وجهي بيه كل شمس مكسوفة الضحى
وموت الغروب
والجنوبي اليعشگ اترابه وضميره
يفيض غيره
وطول عمره..
نجمة يحصدها السهر
وطول عمرج وردة ذبلانه بسنادين الظلام
ليش من مدّيت جفي
صارت ظنونج مناجل
خفتي من ارواحنا يلمها الصلح
وتخضر جفوف السلام
ليش نشفتي الندى النايم على اشفاف الغرام
طارق صبار
رد مع اقتباس
