( روحي )
گصيّره ، وخلگچ أشطوله
ولچ يا روح ، يالچنچ چگاره بمطر
متبلله ومشعوله
بسّچ هيدي وتهدي بعيد الفرح ما اطوله
اهز ايدي
واشخبط بالهوه وارسم دواير ضيم
من اسمعلي هلهوله
تنغلبين ، ما ٱلومچ ركضتي بساگ مشلوله
شمالچ ظاله بوادم كلتها الگاع
مثل شيبة ظفيره فتال مفتوله
راحو ناس منج وانتي طيبة ذات ! معقوله !؟
الشفّه من العطش تابوت ، بيهه احچايه مكتوله
اليحبني يصدّگ عيونه ، ويچذّبَ شما يگلوله
بعد ما ٱثق ، بچولي هواي
نوبــات الدمع چذاب
لـو دگو ثلــث مرات
أگـول الهوه محرك الباب
يا مسرّاح ، تدري بروحي تهله ويبساها الضيم ؟
وبفرگاك مشعوله ،
رفيف عيوني ما بي طارش يجيبك
اليحب بيّ شاره ، خايف شارتي تصيبك
يـ حـٰارم عيني منك ، وانت چنك نوم
ذمتك بيه مشكوله
أنا البالغ گبل وكتي
أنا المسموعه سالفتي
أنا الرادوه يصعدوله
يروحي شبيچ ، جنّچ غافله وتهتي
تتحرك كذلتچ گبل بحچايات
وتميل الترافه البيچ لوملتي
شني الينگال ونگوله
گلتلچ ، گاعهم بيها نزيز گلوب
گلبچ لا تزرعينه
زرعتي سنين ، شحصتي ؟
حلاة الثمر بيدج ينغسل طينه
ياباگت حزن روحي ، برطوبة گاع مشتوله
ويا حزني شجِر زينه اگصّه ويرجع اشطوله
يسد اذنه الفرح عنچ يروحي ، شمايصيحوله
شني هذا السكوت البيچ !
عزة نفس ؟ لو سوله ؟
يالچنچ جگاره بمطر ،متبلله ومشعوله
رضا الكعبي
رد مع اقتباس
المشاركة الأصلية كتبت بواسطة فقار الكرخي
