من زمان الليل خلص
بس لحد الان ماطالع نهار
ظلو يغنون حزني
ليش واكف ماتجي تنزل الستار
يل جنوبيتك نظيفه كلبك اببض
ضايف الوجهك سمار
ووجهك التارسني شوك
مالكيت بصفنته شويه انتظار
تنتظرمن وانه يمك تعبتني
تعبتني شعندك متاني القطار
ونارك الربيح ترجف
لاتدفيها بثلج
هذا انتحار
اختصرني وكلي اجيتك
جيب نارك ناري تطفه
مايهمك نار واطفيه نار
مشتهيك بكد غيابك
بيه جوع وين ماهجرت يلحكني الحصار
من اشوفن سيفك اذكر اجروحي
انته كتلي
لاتسولف سالفه بعز البرد مابيه نار
والمصيبه جرحي المسودن يحبك
وانتد تدري ياجرح بالدنيه مايطلبله ثار
لاتحط بغصن غيري
انه عايش بالخريف
وروحي مليانه خضار
ولاتسميني نبي وحبك رساله
ادلي بيه جيوش هجرك
بلا حمامه وعنكبوت اتحطلي غار
وحبل مرجوحة عشكنه
لاتكطعه
بس تكطعه
تذبح بروحي لعب كل الزغار
هاك اخذ كل السوالف
واحتفظ بجروحي ذكره
بلكت يفز اشتياقك يوم
وترجع النهار