قصيدة چفينك وفايه للجود والرايه مكتوبة لميلاد الامام العباس (ع)
چفينك وفايه للجود والرايه
عباس عباس
يسبع الغاضريه
...
ما تغيب حروفك
كل زمان نشوفك آيه
والمجد ميعوفك
وانت بين چفوفك رايه
يالبقيت بكربله
تضوي يا كوكب عُله
يا هله ومية هله يبوفاضل
حيرني تفسيره
عباس ابو الغيره
ياتاج عالراس يسبع الغاضريه
...
ما عرفنه اسرارك
يا گمر انوارك تزهر
شرف الله يزيدك
ظل يبوس بإيدك حيدر
ربنه رافع رايتك
خيمه النه گبتك
غيرة الله غيرتك يبوفاضل
ساحرني بعيونك
للموت مجنونك
عايش بالانفاس يسبع الغاضريه
...
فدوه اروح لإسمك
ما يفارك رسمك بالي
انته انته الساقي
وبالضماير باقي غالي
حبك بگلبي كبر
يا أَحله مِنّ الگمر
چفك اليروي النهر
يبو فاضل
غيرة علي شايل
حياك ابو فاضل
قران الاحساس يسبع الغاضريه
...
هالعشگ من ربي
وبودادك گلبي هايم
انت نور عيوني
وافتخر سموني خادم
أذنّ آذان العشگ
روحي شمعه وتحترگ
گلبي يهتف من يدگ يبو فاضل
لو ينگطع راسي
عباسي عباسي
للدنيه نبراس يسبع الغاضريه
...
يا اعز من عمري
سلمت كل امري بيدك
يا طيب جروحي
مو بديها روحي تريدك
هذا من عندي وعد
ما اعوفك للأبد
كربلائي هالعهد
يبو فاضل
مولاي عيديه
للكربلائيه
يا آية احساس يسبع الغاضريه
...
كرار حسين الكربلائي
( ابو كميل)
رد مع اقتباس
المشاركة الأصلية كتبت بواسطة sawsanmahmoud
