أنه بنية فقيرة وحيل مظلومة.. للشاعر ادهم عادل
أنه بنية فقيرة وحيل مظلومة..
بحبال العشاير واهلي معدومة..
شنو ذنبي أنسجن وردة ورة الحيطان
حتى من الگمر يا ناس محرومة..
عار البنت لازم تنستر بالبيت
كل لحظة أموت بكلمة مسمومة..
يلومني إذا أضحك بوجه الريح
ويخنگوني إذا يدرون دمعي يطيح
ويكتلوني إذا يدرون گلبي يصيح
ما أريد أنغصب وأتزوج من إنسان
ما أحبة ولا أعرف شنو رسومة !!..
وإذا واحد غصبني وأخذ عفتي بليل
لأن رجال محد يگدر يلومة....
بطلوني الدراسة بعمر عشر سنين
وگعّدت بغرفتي وأحلامي مهدومة..
مستقبلچ بيتچ أگعدي يا تعليم
سكتْ وبالگلب جم صرخة مضمومة..
حجبوني غصب خافوا عيون الناس
أريد أفتح گذلتي طيور مظلومة.
گبعوني لأن طول البنية شراع
أخاف أخطف ذنب عل الصايم بيومة..
خلوني افكر بالشرف ليضيع
وآني من اللعب هستوني مفطومة..
دفنوني گمر جوة الليالي السود
واذا مات الگمر تتطشر نجومة..
وصح أنتم بشر باللبس مستورين
بس هو عقلكم نازع هدومة !!..
شنو ذنبي أعيش الدنيا بس لامرين
البنية بهل الوطن لو خدمة لو نومة..
مرات أريد احچي وأسكت من الخوف
خلوني أعيش بنية مكسورة..
ومو بس سلّبوني أحلامي والضحكات
ولا خلوني دمعة بغرفة مشمورة..
أخذوا حتى روحي وفطرة النسوان
لا أگدر أحب لا أصير مغرورة !!..
أتمنى أحن وأشتاگ وأنطي ألوان
أتمنى أعيش بنية مو صورة..
أنه الما عندي قيمة ولا دمع مسموع
آنة من الصدگ على السكتة مجبورة..
إذا أصرخ لان مظلومة صوت يصيح
خزيتينة يم ألگاج مگبورة..
أنه الما عندي حس مثل الشجر بالبيت
وهنيالة الشجر يحچي وي عصفورة..
أتمنى أعيش بدنيا بيها أنسان
بس مرة بحياتي يگلي معذورة..
يقيسون الستر بالهدم ما يدورن
الناس بلا هدم مرات مستورة..
وأذا أحنة عقلنة يعوزة دين وراي
عقلهم عل الاقل محتاج سبورة..
ادهم عادل
رد مع اقتباس
