قصيدة : امير تحكم على الظالم
للشاعر : زين العابدين المرياني
المناسبة : استشهاد الامام الكاظم (ع) 1440
طور : #حسين_للتالي_عنواني
حسينية قصر الزهراء - الكاظمية المقدسة
أمير تحكم عله الظّالِم
أمير يا سيّدي الكاظِم
إنته الأمير اِشما يصير اِمچانك
معروف قَدْرك عَن قدر سجّانك
عِجْزو يغيرون الأمر عدوانك
سابع خليفه اِعله البشر عنوانك
أمير لو تِنكر الوادِم
أمير يا سيّدي الكاظِم
ظالِمَك ما يوصل الغايه او نيته
رايد يذلّك بالعكِس ذلّيته
اِبْمُظلِم سجِن واِبحيرته خلّيته
ظلمه السجن وانته الضوه اوضوّيته
أمير واِعله النّصُر عازِم
أمير يا سيّدي الكاظِم
حلقات بيْديك السلاسل سبحه
وابكيفك الظالم تريد اطّيحه
ذاك المُخطّط بالإشاره اتمسحه
والدنيه بعيونك تعادل لمحه
أمير للباطِل اِتقاوم
أمير يا سيّدي الكاظِم
يا سيّدي بغداد سجنك بيها
صابر عليها او تِعْرِف اِبتاليها
اتخضّر مناير عالِيات اِعليها
اِبهالگاع تصبح گبّه واِتعلّيها
أمير بالماضي والقادِم
أمير يا سيّدي الكاظِم
بالسّجن هسّه او بالبُعد عَن دارك
باچر تغصّ اِلگاع من خطّارك
بغداد تهتز مِن كثر زوّارك
لا تنعد ولا تنحصه أنصارك
أمير واِبهالأمر عالِم
أمير يا سيّدي الكاظِم
گالو غريب اِجنازتك شالوها
هايِ المدينه لازم يغيْرُوها
و الكاظميّه بِسْمك يسمّوها
او مِن كل نواحي الدّنيه يتعنّوها
أمير هذا الوعد لازِم
أمير يا سيّدي الكاظِم
رد مع اقتباس