شعر شعبي عن الأمام الكاظم ، موتك إنطاك الحياةْ
ما سِجَدت الغير ربّك ... هذا سر المُعـجزات
صبرك يخلّد وجودك ... موتك إنطاك الحياةْ
أكرَمك جَــلّ جــلاله ... يـبن فخــر الكائنات
مو شرط كل عدل عايش ... ولاهو كلمن مات مات
بحبر الخلود إتوثّق اكــتابـك ... هذا المِدادْ
والهالسببْ ربّـك جـعـل بابك ... باب المُـرادْ
اشما يضم الليل شمسك ... تشرق بوجه السماء
يا غشيـم ايلاوي صبـرك ... إنـته نهـجـك كربلاء
باب سِـجنـــك ما يهـمّـك ... يلّـي نبـضـك كبرياء
إنـتــه بــاب اللّه تـفـتحه ... ساجد وتـقره الدُعاء
لا ما يخيب القـبّـل أعتابك ... ومن اللّه راد
والهالسببْ ربّـك جـعـل بابك ... باب المُـرادْ
شـايل جـروحــك بگلبك ... گلـبـك الهمّك وسيع
يا بحر واعــداك گطـره ... بـيـن أمواجـك تضيع
ما بقه السندي ابن شاهك ... لا فضل إبن الربيع
إنته بالسجــده الطويله ... تدري تعبك ما يضيع
والصبر فطره بجوهر أصلابك ... والتقوى زاد
والهالسبــبْ ربّــك جـعـل بابك ... بـاب المُـرادْ
سر خلودك صـار واضح ... للـقـريب وللـبـعيد
ابحمدك وشُكرك الربّـك ... تكسر قيود الحديد
والدليل بكل بساطه ... ويــن صـــار اللا رشيد ؟؟
إنته باقي وهُـوّه زائل ... مُخـتـصر هــذا مفيد
حتى ابْسكوتَك واضح إجوابك ... صمتك جهاد
والـهـالسبــبْ ربّـك جـعـل بابـك ... بــاب المُـرادْ
بابك الباري جَـعَـلهه ... باب حاجه الكل سؤال
واليزورك يبــن جعفر ... يدري يا راهـــب الآل
ما يرد وچـفّـه خالي ... إمـــرادك يگـلّـه تـعـال
والكرم عندك سجيّه ... ماكو بـــي كلمةْ مُحال
للّي يـزورك حاسب إحـسابك ... بالبُشرى عاد
والهالسـبــبْ ربّـك جـعـل بابـك ... باب المُـرادْ
وحـدك بطامــوره ظَــلمـه ... والأمــل بالله ضواك
فرصه بيهه تشكر اللّه ... شـوف سبحانه اشنطاك
إنطاك گبتـيـن ومـنـاير ... وإنـتـه عـطّاي النِــخــاك
گبل ما يبدي ســؤالـــه ... إتـجـاوبـــه وتـگـلّـه هاك
تحضر جميع اليحضر إمصابك ... يوم المَعادْ
والهـالـسبــبْ ربّـك جـعـل بابك ... باب المُـرادْ
يا غريــب الكاظـمـيّه ... كل محب تستقبله
يقره عالباب بخشوعه ... هـلــه بالزاير هـلـه
بيك يا موسى بن جعفر ... يلگه حل المشكله
يشكر البــاري ونعـمـتـه ... يعني كل همّه إنجله
شُكرك الربك وضّح اسبابك ... عن دينه ذاد
والهالسببْ ربّـك جـعـل بابك ... باب المُـرادْ
عمار هليل الواسطي
رد مع اقتباس
