قصيدة : انحني الثورة صمودك
للشاعر : سيد عبد الخالق المحنه
المناسبة : رثاء الامام الكاظم (ع) 1440
ليلة 22 رجب 1440 - العتبة الكاظمية المقدسة
طور : #شلون_ما_رديت_اليه
انحني الثورة صمودك
و اسجد الهيبة سجودك
و الذي يكسرلي ظهري
اني حر و انته ابقيودك
عايش ابظلمة و ضوة دنيه اعله نورك
اشما يغيبوك ابسجن يكثر حظورك
لو يگيدوني ابسلاسل من ازورك
حته من يبدي الألم اعرف شعورك
عذبوك و انته انته
ياللي سجّانك دفنته
سيدي اقبل لي عذري
اني حر و انته ابقيودك
علمتني الطاغي ايامه گصيرة
علمتني الميت ابموتة ضميره
و الكرامة اهواية و الدنيه زغيره
طاحت اقصور بقت بس الحصيرة
و الرشيد و ملكه وينه
هسه بس شخصك لگينه
انحني و ايدي اعله صدري
اني حر و انته ابقيودك
ممكن ابجيش و قيادة تبقه زله
ممكن ابطامورة ظلمة و تبني دولة
من اطوف ابحظرتك همي اشيحمله
اشعر ابحال الغريب الرايد اهله
للاهل اسمع حنينك
ينخسف صدري الونينك
حزني ما يكفيله صبري
اني حر و انته ابقيودك
ثورة اگيودك بقت تنقل مصابك
حتى كل جيل اليجي ايقدس ترابك
يا ملك و ابكل رجب يبدي انتخابك
كل سنة انبايع نجي و نبجي اعله بابك
بابك اينادي يزاير
اطلب و ما تبقه حاير
و اني كل مشكلتي ادري
اني حر و انته ابقيودك
عايش ابطف كربله و الدنيه دمعه
بالسجن ون عمتك زينب تسمعه
و السجن موكب جعلته انته تنعه
يا ثواب الوزعت دمعك توزعه
تنعه و الزهره تزورك
سللسلة و حايط حظورك
حته لو گطعولي نحري
اني حر و انته ابقيودك
نعشك الفوگ الجسر يترك اشارة
للحشود الرافضه الكلهم الغياره
نومتك يبن النبي طيحة منارة
وينه هارون و يجي ابيوم الزيارة
خل يجي ينظر سجينه
و الملايين الحزينه
كل شخص دمعاتي تجري
اني حر و انته ابقيودك
احنه لو يمك يبو النفس الأبية
من يسجنك و احنه جيش الرافضية
والله جان انطلعك و نهتف سويه
لا فتى الا علي حامي الحميه
و نهتف و نكسر علمهم
انطلعك و ننهي حكمهم
سيدي ما يسوه عمري
اني حر و انته ابقيودك
----------------
رد مع اقتباس
المشاركة الأصلية كتبت بواسطة الأمل الوحيد
