((الرسايل))
البارحه المرسال غنيته وبچيته
انه من فتره المراسيل أدفنتهه
خفت لا
اقره ، واسافر ، واغترب ، وابجي ،
واغني ..
البارحه المرسال بالليل وقريته
وسافرت بيه المواويل
وخذتني لغير ديره وهيه حيره
لا المرسال القريته يذبني يمك
ولا اندلك
البارحه محتاج اشمك !!
وضاكت ضنوني وهوه الغرفه خنكني
وصحت بسمك ،
وانه شنهي
انه لو ريح اعتنيت ونمت يمك
وانه لو رسام ارسمك
مو حزن حزني لون ما اشوف حزنك
مو جرح جرحي لون ما اجيس جرحك
لو دريت العافيه اتغفي بشليلك
وداعتك جا عالحزن ليليه أضحك
خلني مرتاح اويه حزني
المهم وضعك
يا حبيبي وداعت الله البيه
لو مر بيك تزهگ
بس احبك
وانه كل مغرب يتيم متاني جيتك
استاهدك تگرب واطش روحي هلاهل
وانتشي واسكر بجرحك
يا حبيبي الشوگ نده اعله الرسايل
وانطفيت وزاد حملي اعله المحامل
مرني واحجيلي ولو جذبه قديمه
يا حبيبي وداعت الله الگلب جاهل !!
لــ حســن وصــفي
رد مع اقتباس
