طف كربله ابتابوت...لو زينب إنتي
متوسده نار اخيام...واعليهه نمتي
نعشچ ثگـيل
طيحة كـفيل
لو زينب انتي...؟
شفت نعشچ ارض تمشي...حرت مدري شسمي
خيم تلهب زلم تنهب...شريعه و تل شفت بي
شفت نبلة وطفل ظامي...سكت وأسمع محاچي
شفت طيحة أخو عالشط...و أخو أسمع بواچي
نعشچ اشوفه بطول درب السبايه
ساحة حرب والخيل زفة منايه
خوف وعويل
طيحة كفيل
لو زينب انتي...؟
___________________________________
شفت الف وتسع مية...جرح ينزف عالتراب
شفت رايه وزند طاحن...گمر غيب بالعتاب
شفت رفسه بصدر غيرة...و نذل ينظر علحجاب
شفت أشرف نِسة العالم...حياره ابين الاجناب
لامو نعش ينشال روس الغياره
عايز شمر ويصير موكب يساره
درب الطويل
طيحة كفيل
لو زينب انتي...؟
___________________________________
منو يحمل ثگل نعشچ...يبت حيدر تسألين
وأهي بس النجف تگدر...تشيل الطف تعرفين
إذا خذتي الحزن كله...بعد عدنه اشتخلين
نعم ميته لچن بعدچ...لـبو فاضل تحنين
نعشچ ابو الحسنين لوشاله يتعب
أثگـل عليہ من باب خيبر يزينب
حامي الدخيل
طيحة كفيل
لو زينب انتي...؟
___________________________________
شفت سبعين الف فارس...وسط نعشچ يصولون
وابو فاضل كبـر خَنزره...و أُهم گامو يزغرون
ألف طاحوا ألف راحوا...ألف ظلوا ينظرون
مله جوده ومسح إيده...خجل من اليعطشون
رد وغبار الخيل غطـه الشمس بي
غاضب وسـبع ابحور ماظن تطفي
هذا الدليل
طيحة كفيل
لو زينب انتي...؟
___________________________________
انه شايف نعش لكن...خلل يمكن بالعيون
شفت شبه الزلم تركض...على الخدّر يسلبون
إذا زينب أهي الميتة...إذا بيمن يشتمون
وانه اسمع عدد منهم...بـسم زينب يصيحون
زينب ابين النار أنظر عليـها
تلزم هذوله ايروح ذاكـة من أديها
وين البديل
طيحة كفيل
لو زينب انتي...؟
___________________________________
يزينب إنتي مو إنتي...جوابچ ماعرفناه
رمال وخنصر وحافر صدر...مكسور أكو هناه
أبو الأكبر بلامنحـر...وسط نعشـچ رأيناه
خرابه وطفله مقتولة...وطفل ميت لگيناه
أحمر هذاكه السوط دم متنچ اعليه
ماخذته بالتابوت المن توديه
منهو اليشيل
طيحة كفيل
لو زينب انتي...؟
___________________________________
إذا حيدر حمل نعشچ...عجب وين اليشيعون
عليل ايگـود بـرقيه...يعمتـنا يصيحون
دوسعوا لحد عمتنا...علي ايوصي اليحفرون
اريده كُبـر المخيم...تره اخوتها يحضرون
وسط الگـبر ينشاف چف ودمعتين
ثاري اعله چف عباس نزلها الحسين
طاح العليل
طيحة كفيل
لو زينب انتي...؟
___________________________________
الشاعر ~ السيد عبد الخالق المحنة
___________________________________
القصيدة بصيغة
<< Mp3 >>
رد مع اقتباس
