قصيدة يا اسد بغداد للامام الكاظم عليه السلام
يا أسد بغداد
---------
يا أسد بغـــداد يا باب الحوايج
-----------------
اجيت ودمعة الأحزان اجريلك
ابث آلآم كَلبي وهمـي اشكيلك
مثل يوم اربعين حسين امشيلك
جريح ومن بعيد جروحي توميلك
والجمـر وگاد يا باب الحوايج
--------------
عَـلَي ضاگت الوسعه ودهري جار اوياي
واجيتك بيك الوذن من هضم دنيــاي
اجيتك شايــل همومي وثگــل بلواي
يـــا دكتور جرحي وبيدك انت دواي
وانت باب مــراد يا باب الحوايج
-----------------
يا موسى وعصاتك سيدي قيودك
يا فـالــق بحار الهـم عن وفـودك
فتح بابك لكــل النــاس معبـودك
وصرت باب الحوايج للگصد جودك
ومگـصد الوفاد يا باب الحوايج
------------------
غريب گضيت عمرك بالسجن محتار
وگبرك صار مأوى لكل غريب الدار
اجيت لحضرتـك يل ما تــرد زوّار
وبيك الامل يا من تكرم الخطّــــار
وهل أمل يزداد يا باب الحوايج
------------------
خطوه بخطوه وبگلبي الأمل يكبــر
تگضي حاجتي عندك يبن جعفـر
ساعه الروح تفرح ساعه تتكــدّر
ساعه الگلب يهنه وساعه يتحسّـر
ذايب ومـا هــاد يا باب الحوايج
---------------
تگضي حاجتي وأفرح وأتبسّم
واذكر لوعتك واتلوّع واغتم
وحيد بدار غربه وبسجن اظلم
اومصيبة چبدتك ذوّبهه جمر السم
ومحنة الاصفاد يا باب الحوايج
------------------
الكاظمية المقدسة
عقيل الكاظمي
رد مع اقتباس
المشاركة الأصلية كتبت بواسطة ثامر الحلي
