واجب نطخي الراس يم زينب وعباس
***
ياصاح اخذ هذا الخبر والمعنه بحروفه
تاريخ وادي كربله يتشرف يطوفه
معنى مثل ماي البحر والغانمه جروفه
واضح مثل عين الشمس والعالم ايشوفه
وبكربله صوره بالفكره منظوره
جمعت جميع الناس يم زينب وعباس
***
ياصاح هاذي كربله بجروح ماضيهه
ترويلك اخبار الدهر ولي جره بيهه
من يوم حط بيهه ظعن خيرة اهاليهه
رسموا مواقف خالده جوهر معانيهه
عدهم خبر شاهد للصادر أوارد
بذكره تطيب انفاس يم زينب وعباس
***
واجب على كل البشر والكون وجناسه
لو نزل وادي كربله ينضرله بحساسه
ويمشي الابو اليمه بخجل والعبره بنفاسه
ولعلوم زينب والگمر خل ينحني راسه
يم شمعة الديره وعباس أبو الغيره
يلگه خبر نوماس يم زينب وعباس
***




زينب جبل من الصبر معروفه بت حيدر
من صغر سنهه النايبه وياهه تتكرر
ورده يحاربهه العطش رغم العطش تكبر
رغم الحزن رغم القهر عود الصبر اخضر
لاينشره وينباع ويغيض بالزراع
والصبر فاض أحساس يم زينب وعباس
***
عباس سبع الگنطره والغيره عنوانه
من صغر سنه قسوره يشهدله ميدانه
حامل لواء المرجله والمرجله شانه
كافل خدر أم الخدر زينب الريحانه
ريحانة وأخته وعباس اخو خيته
ماقايسه بمقياس يم زينب وعباس
***
معنى الاخوه ماوصل خوتهم وثوبه
شمس وگمر بيهم اجل أمثال مضروبه
الكونين تدري بالشمس بالدهر مهيوبه
وتدري لون صال الگمر كل حومه مگلوبه
وبمعظم الأمثل انشوده للأجيال
والقلم والقرطاس يم زينب وعباس
***
هاني حماده البلداوي
11/ ذي الحجه / 1438