هنا

[احمد العثمانيے]

الساعة دكت
أدري دكت
خلني نايم.. دنيه ليل
وجية الغبشة بعيدة أهواي
درب الغبشة موحش
وآنه أدري الليل يطوي ابليل
والطيف اشتهاني
وكمرة زتت كمرة
والفارس لكاني
ابعتبة الحرية واكف
بيرغ أحمر شايل ابجفي
ونشيد البارحة ابروحي حداني
الساعة دكت
: لاتفززني
بعدني أحلم تراني
شفت عرس القاسم
ونذر أمي
والياس .. وصواني
وأسمع أبروحي صهيل أخيول فرسان
وجناجيل... وتراجي
والمعاضد.. والمحابس
والروازين العليهه أنذور خضره
العمر سفرة
العتبة حضره
انرشت ابماي النذر
آه.. النذر
آه الجسر
عابرلك..
وصوبينك اشتعلن اعيون
ايجدحن
ويضون على الوان الخراب
عالمآذن.. عالكنائس
عالتكايا
وعالنثايه الطالعات امن المدارس
على تنورات
بيهه الشذري يضوي
وع الغياب..
آه .. ياصوب الغياب
هاكثر فرهدني حزنك
هاكثر عذبني هجرك
هاكثر...
جم هاكثر
يا هاكثر بعدك شباب
الساعة دكت:
أدري دكت
خلني حالم
شفت حاكم .. بيده تفكة امزنجرة
وشاجورهه أيصيح عليهه
وشفت ورده
ومايهه أمغبش عليهه
وشفت نثيه.. أشلون نثيه
الدنيه طاحت بين أديهه
وشفت.. لا.. ماشفت
مثل الشفته
ويه الحرب.. ويه السلب.. ويه النهب
كبل الباب ذاك
الرزه من زعلت عليه
سولف وغاب
.. غاب

[فقار الكرخي]

الله عليك ابو شهاب ياذوق

[احمد العثمانيے]

الله عليك ابو شهاب ياذوق

حبيبي فقار