الله يسنين المضَن رحلة قطار ..بسچة .....
ما ترجع بعد لا حاشة
مختصر چنت الوكت ..
ضحكة جهال..
مناغة أمي ...
و لعبتي و خرخاشة.....
لسة أذكر ذاك شارعنة القديم
و ذيچ طوبتنه تمر أبالنة ...
و لسة أذكر جدي وملوحة حچيه..
أيغازل أبيبيتي چان أگبالنه ...
وين چاي العصر راح ؟ .....
و حچي أبوي ...
وين لمة كل عمامي بدارنة....
چان كل همنه المعلم من نجيه ..
و (القراءَة) و طول وجهياتها
( ليلى والذيب ) أشكثر أذتنه حيل
چان همنه نگضي بس صفحاتها
نخطف على الليل..
نتناگط سفار ...
و نفرش أحلام بشليل ضنونه
و ناكل المقسومة ....
والله نگلة زيد...
و لـ الله نرفع بالشكر ماعونه
ريت لا طال العمر ...
لا جانة ليل ...
و كل شي يبقة بصيغتة و بمچانة
أختلفنة و أختلف هسه الزمان ...
و أنمسح كل شي حدر عنوانة
النام بأحضان الوكت حسبة سنين
الريل أجاه و خل يلم أفراشة
الله يسنين المضن رحلة قطار..
بسچة ...
ماترجع بعد لا حاشة
لــ الشاعر علي نجاح الكناني
رد مع اقتباس
المشاركة الأصلية كتبت بواسطة فقار الكرخي
