هنا

[علي الازيرجاوي]

حصاد النار

نزرع والحصاد الغيرنه ايصير
العمر نـكضيه مثل تعب النواعير



جربنه الليالي وشفنه الايام
وخسرنه عيونه الـجٍـانت نواطير

ورجعنه من السفر مانملك جناح
تناثر ريشنه بريح المشاوير

رجعنه انخط جدم تعبان بالصيف
اكل منه وشبع بالشارع الجير

و كــّلبنه الضنون وشفنه الاحلام
رماد الـجـانت تبين تصاوير

وضحكنه من لـكينه العمر مغشوش
ضحك الخشب بحلوك المناشير

ضحكنه بكل حزنه الضحك مرات
يشع من الـكلب مثل البسامير

شوسع هذا الفضا شعلو السماوات
لـجن ياحيف مسجونه العصافير

اذا حته الهوى بينه اشتعل نار
بعد ياطير جنحه ايعلي ويطير

خسرنه ولسه نتوقع خسارات
عفيه كلوبنه شتحمل وشتصير


كثر السفر ملينه المحطات
وبعد مايرهم ويه الجرح تخدير


العله جروحه الملح مايـكدر يبات
ولاحته يصحله النوم تقتير

بضافرنه الخشب كضينه الايام
[وكسرنه بالضلع ماصحله تجبير

رضعناهن مصايبنه من الانفاس
وتـكمطنه بحزن ليل المعاسير

وركضنه ويالزمن ركضت مجانين
شما غارت خيوله خيولنه اتغير


عبرنه شكثر ايام ومسافات
اعله حبة امل وحده وطاحت ابير

وبعد بينه امل رغم العذابات
ونـكول تهون ونعوض المخاسير

من سود العجارب بينه لدغات
بعد متهمنه لدغات الزنابير

دامنه حزنه وكلنه هيهات
يذل الذيب ويطيع الخنازير


اذا يشفه الجرح وتطيبه لـجمات
نحس بالنار ماي وفوكنه اتدير

الجميل
طالب الدراجي

بغداد 1989
تحياتي

[مصطفى العراب]

كلمات رائعة عشت يا مــــــبدع

دامنه حزنه وكلنه هيهات
يذل الذيب ويطيع الخنازير

[علي الازيرجاوي]

شكرا يا ورد نورت

[كبريائي قاهرهم]

أبــــــــــداع
بلا حـــــدود
جزيل الشكر والامتنان
لروعة النقل اخي العزيز
ودي وعبير وردي

[حنين الوطن]

كل الشكر والامتنان على روعهـ بوحـكـ ..
وروعهـ مانــثرت .. وجماليهـ طرحكـ ..
دائما متميز في الانتقاء
سلمت يالغالي على روعه طرحك
نترقب المزيد من جديدك الرائع
دمت ودام لنا روعه مواضيعك

لكـ خالص احترامي