لغوها الحصة
لغوها الحصة
--------------
لغوها الحصة ابشركم يالاخوان .. وبالإجماع سنـّو هيچ قانون
حرصاً عالشعب من المعاناة .. ومن ضيم الوكيل وحمل الامتون !!
ولأن هذا الشعب مترفـّه اهواي .. وتعافه وخفنه خاف إتصيبه الاعيون !!
شلكم بالطحين وكله مو زين .. شويه إتطوّرو ، روحو اكلو صمون !!
وشلكم بالشكر گولولي والزيت ؟؟ كولسترول كلها تسوي قولون !!
إمن الايمان النضافة اسلامنه إيگول .. لا مو إلا تايت وإلا صابون !!!
وتكلف الدولة هاي الحصة أموال .. وللاحزاب البلد كل خيره مديون
شلنه الحصة منكم حتى نرتاح .. ولأن نعرف تبلعوها وتسكتون !!!
وسألنه اعله السبب جاوبنه ببرود .. وضحك من الكلب وشگال تدرون ؟؟
نقضي اعله الفساد بهالأمر هاذ !! ونحميكم أكيد إمن اليبوگون !!!
أقبح من فعل عذرك يمسؤول !! كلامك ما يعقله إلصابه الاجنون
الحرامية انتو همه ، وهمه انتو .. يل بخير العراق انتو التنهبون
يكفيكم حرب للفقرة والناس .. حسـّو اشويه بهمـوم اليجوعون
همزين الهوه مو بيدكم صار .. (نفس) چان الشعب ماظن يشمون !!
خيعون الشعب من انتخب راح .. فوگ الموت داس وراح ممنون
وما يدري انتخب واختار حيتان .. وكل خير البلد همـّـه اليبلعون
يا راس الفساد وساسه والذيل .. لابد يوم صدگوني تطيحون
لأن حوبة الفقرة إتطيح الاجبال .. يمهل ، لا ميهمل خالق الكون
اصرخ يا شعب بس انهض وگوم .. واكنسهم كنس لن ذوله طاعون
اذا ما واجهتهم تبقى جوعان .. وتظل كل عمرك بدمك يمصون
لا ترضه المذلة وترضه بالجور .. وانت ابن الحسين وعابس وجون
وأبد لا تعتقد تتعدل الحال .. ما دام الحرامي يبات مامون !!
ما دام الحرامي يبات مامون !!!!!
رد مع اقتباس
