هنا

[إدريس]

قبل اعوام تعرفت به هنا.. واليوم هو غير موجود
لم يترك سوى مشاركات ومواضيع رُغم محتواها السعيد
تخلق في داخلي غصة.. أعز اصدقائي
أبي .. أخي .. حبيبي .. صديقي .. أبني الذي لم تنجبه الحياة
عرفتهُ وانا في الخامسة عشر من عمري .. واليوم انا في الواحد والعشرون !
قد مضت 6 سنوات .. 6 سنوات يا كرار
كتبت بعفوية انت تُحبها يا صديقي "رسالة" ولانك لا تستطيع قرائتها سأتركها هنا .. لعلك تقرأها في يوماً ما ..

________
هلو كركر
مشتاقلك
اكثر مما تظن ..
بعدني اكتم حبك وحزني على فقدك واتهرب منك
يعني صداقتنه نفس ما هي
انت ترجعنا واني أفرقنا ..
انت ثابت وأني مُشتت
انت أتجاه نظرك واحد وأني حاير وين أباوع
بعدك تكره التكلف
واني لساتني مُتكلف
انت هسه وحدك..
اني هسه عندي هواي اصحاب
منهم يحبوني .. من ريحتك
منهم يبغضوني .. يتكلمون عني بالسوء .. ويوصلني حجيهم واسكت
تعلمت منك اتغاضى .. ما اتعارك ..
ما بجيت عليك قبل .. بس اليوم انكسرت وبجيت ..
ليش جنت مُصر تكون صديق مثالي ! وتتركلي هل فراغ ؟؟
حتى من جنت ازاعلك وما احاجيك جنت تلكه طريقه تكلمني
لسه اذكر من سويت هذا الحساب ! امير العتم والظلام
وتعارفنه من جديد ومكنت ادري هذا انت .. وعرفت تالي
جنت عاجز كدام محبتك الي ووفائك انو ابتعد ..
يا اخي مكدر افوت على احد ب اصحابي بدون ما اقارنه بيك !
تدري ؟
من تضيكَـ الدنيا .. من تصير باهته ..
اتمنى وجودك .. اتمنى لو جنت موجود قبل سنين بهذيج الاشهر
من ودعتني قبل لا ادخل بذيج المستشفى مجنت اعرف انت الي دتموت مو اني
مجنت اظن اني حطلع عدل وانت تروح ..
مجنت متوقع انو تخلص اشهر العلاج واكتشف انت ماكو
عبالي حتكون منتظرني .. مشتاقلي .. متحضر حتى تتصل وتكلي تعال نكمز ونعيط !
كالولي جذب .. كالولي مصوب .. كالولي شهيد .. كالولي ميت ..كالولي م....
مهما اختلفت الطريقة والتسمية انصدمت .. متت ..
تمنيت ما رجعت عشت مو بس علمودك
بس يا اخي ,, هي ضاَكت هواي .. وانته الي جنت تخفف حملها .. وانت الي جنت تضحكني واضحكك
ليش ادزلك هل رسالة .. ؟
لان تعبت
تأكدت ماكو منك .. وصار لازم اكلك أنو اني يأست وجذب جان كلامي مال تقبل الاقدار .. اني ممتقبل روحتك
حياتي شلونها ..؟
والله زينه
لان اني صرت ساكت وي الناس المؤذية
هواي اسمع واتغاضى ,.,,
هواي انجرح وبس التهي بجرحي وما اسأل ليش ؟!
هواي انظلم .. حتى من نفسي وما اطالب بحقي
دمشي بطريقي وحدي ..
هل مره بدون احد
كركر
يجوز تنتهي الحياة ومتلكيني .. يجوز ما حنلتقي .. ان شفت هاي رسالتي تذكر بأنك كنت أجمل صدفة مرت بحياتي
يجوز اعوف كل شيء يجمعنا تالي لان هل ذكريات حملهن ثكيل يا خوية .. اعرفك حتتفهمني كالعادة ..
محنساك بدعائي ..
تذكر شلون انهي رسائلي ؟
ح اذكرك

ان فشلت أن خسرت " على الاقل ".. سأكون للمرة الألف قد حاولت

في النهاية
أُحبكَ يا بُني

[آيـــــة]

الله يرحمة

والله ينطيك الصبر ان شاء الله

[عدنان الواثق]

ادريس انت مليان مشاعر مليان

[مريم@]

الله يرحمك كرار

[❀aşk çiçeği❀]

عيوني دمعوا فراق الصديق صعب وبالذات موته
مجربه هلشعور

الله يرحمه
ويعين قلبك ع كل لحظه عشتها وي كرار

[ميمي]

هي ضاكت هواي وانته الي تخفف حملها جان نسمه كلمه جان تكتل . .
مو بس انته ممتقبل عدم وجوده ويانه ..
فراغك ماينملي كركوري مو لان قريت هلموضوع واكلك هيج انته اكثر واحد تعرف انته شنو وانو انته كنت الملاذ الي وللكل بس الكل مانجح وينقذك من ألمك وحياتك كله مكتوب صح بس رحيلك متعب حيل .. اشتاقيتلك حيل .. احتاجك جدا ومفتقده لروحك وسوالفك بشي متصوره.. ادري بيك تحس وتعرف ..روح ريمه انته

[نـايـا]

ربي يرحمة

[إدريس]

هي ضاكت هواي وانته الي تخفف حملها جان نسمه كلمه جان تكتل . .
مو بس انته ممتقبل عدم وجوده ويانه ..
فراغك ماينملي كركوري مو لان قريت هلموضوع واكلك هيج انته اكثر واحد تعرف انته شنو وانو انته كنت الملاذ الي وللكل بس الكل مانجح وينقذك من ألمك وحياتك كله مكتوب صح بس رحيلك متعب حيل .. اشتاقيتلك حيل .. احتاجك جدا ومفتقده لروحك وسوالفك بشي متصوره.. ادري بيك تحس وتعرف ..روح ريمه انته

ميمي .. نبكي واحدنا يقول للاخر اصبر وتقبل
ما حصل قد حصل علينا ان نواجه حقيقة رحيله ..
كرار في مكان افضل وبدعائنا سيرتاح اكثر
لقلبك الصبر والطمأنينه
اعلم بأنكِ حقاً كن اكثر المتألمين لرحيله وقد سمعت كم عانيتِ لاجله ..
اسأل الله ان يمنحكِ خلاصاً
هو اللطيف الكريم

[August]

حرام عليك مار
اوجعت قلوبنا



الله يرحمك برحمته اخي كرار
ويعفو عنك ويسكنك الجنة .. امين

[فقار الكرخي]

فل يغفر الله له
ادريس
انت الصديق الحقيقي
الذي لاينسى اصدقائه
ليت الكل بوفائك
اوجعت قلبي