٧ طرق للتركيز اثناء القراءة والمراجعة :-
١- لا تنطي مجال لدماغك:
أستناداً الى بحث سوته Nilli Lavie بكلية لندن الجامعة لگت انه الهوسة او الضوضاء المتعمدة تساعد على التركيز، يعني مثلاً اذا تريد تقرا لاتگعد بمكان هادئ، شغل موسيقى او افتح باب الغرفة حتى يجيك صوت من برا، بهيچ حالة حسب "نظرية التحميل" اللي اقترحتها الآنسة Nilli دماغك راح يركز على ذني الشغلتين فقط وراح يهمل كل الشغلات الجانبية.
٢- قشمر نفسك (اي لاتستغربون):
الدراسات تگول انه البشر من يسوي شغلة مملة، وينطي وعد لروحه أنه راح يكافئ نفسه بعد مايخلص حتى لو بشغلة بسيطة راح تخلي يفرح، اما اذا المكافأة چبيرة فأكيد راح يتحمس اكثر، هالشي ممكن يشتغل بصورة افضل اذا چان اكو من يتحداك (يسويلك واهس) حسب مايگول الأستاذ Michael Esterman اللي مسوي بحث بعنوان "من الصعب ان تخدع نفسك".
٣- امتحن نفسك:
احسن طريقة حتى تعرف عقلك وين سارح وحتى تعود نفسك وتوفر وقت بيوم الامتحان هي ان تمتحن نفسك، اللي جربوا يمتحنون نفسهم وره ما انتهى الامتحان اللي هم سووه ب5 دقايق بقت ادمغتهم تفكر بالموضوع.
٤- من تاخذ ريست خلي دماغك يسرح:
من تاخذ ريست احسن شي يريح دماغك هو التفكير بموضوع بعيد عن اللي تدرسه، ويگول البروفيسور بجامعة هارفرد Paul Seli هالشي ينعش دماغك ويجدد تركيزك، يعني تروح تفكر بغير مشكلة ببالك وبعدين ترجع لموضوعك الأصلي.
٥- استرخي:
يجوز تتصور انه التوتر وارتفاع الادرينالين يساعدك بس هالشي غلط، لأن الأجهاد راح يحفز الدماغ على افراز الهرمونات ومنها هرمون النوردالين المرتبط بدوائر التحكم المعرفي بالدماغ، وهالشي ميخلي الدماغ يركز على الموضوع المطلوب منه.
٦- نام وگلبك بارد:
السهر يأثر على اداء الدماغ بشكل عام ويأثر على استجابة الدماغ للعوامل والمنبهات الخارجية والداخلية، بالأضافة لذلك انه من الفوائد العظيمة للنوم هو إعادة ترتيب المعلومات بالذاكرة، وحسب ماتگول الابحاث الحديثة انه اذا چانت عندك ساعة فراغ قبل الامتحان فأحسن شي تسوي هو ان تنام.
٧- شخبط:
بوحدة من الدراسات خلو اشخاص يستمعون لأصوات مملة، تبين انه قابليتهم على التذكر تكون افضل اذا سمحولهم يرسمون او يشخبطون او يكتبون اثناء الاستماع يعني مثل ماگلنا بالنقطة الاولى تقريبا،ً وبالرغم من نجاحها بس مرات تسوي نتائج عكسية.
رد مع اقتباس
المشاركة الأصلية كتبت بواسطة Aabdullah
