قصيدة : شالوا نعشها
للشاعر : السيد عبد الخالق المحنه
المناسبة : وفاة أم البنين 1440
المكان : العتبة العباسية المقدسة - كربلاء
ليلة 13 جمادى الآخره 1440 هـ
شالوا نعشها واليحملونه اثنين
واحد ذبيح و واحد ابلا جفين
زينب تنادي الـ كربله جيبوها
بين المخيم و النهر شيعوها
واسوها
هاي الغريبة الماتت و منتظره
هذا نعشها لو خيم مستعره
انظر عليها و ركز ابهالنظره
تلگه موت و ضمه و سياط و اسره
محلاها بالطف من نشيّع الحره
خل يلتقن طف مشرعه و طف جمره
يا ابا الفضل جف الكلايف مريود
شايل نعشها لو شلت سهم الجود
ام الوفه يهل الوفه وافوها
بين المخيم و النهر شيعوها
واسوها
يم المخيم لازم اتنزلوها
خل تنظر اخيمنه الذي حرگوها
اهنا يتامه بخيلهم سحگوها
و اهنا ييمه زينبج سلبوها
الذاكه المكان الوالده ودوها
تنظر اثر مهد الطفل خلوها
اغرب نعش نعش امي عبر الأزمان
عطشانه ملگه و اليشيع عطشان
من تكتفي من الخيم شيلوها
بين المخيم و النهر شيعوها
واسوها
لازم اخبرج بالأمر و اتعذّر
كل فاجعه و بيا مكان اتذكر
اهنا وگع عبد الله و اهنا جعفر
يحبيبه عون بهالمكان اتوذر
منّا ركضت اعله اخوتي و اتعثر
و اهنا طحت من الكفيل اتگنطر
و اهنا لطمت اعله الوجه و اعله الراس
و منّا شفت جف انگطع من عباس
اي ما نست لكن بعد ذكروها
بين المخيم و النهر شيعوها
واسوها
قدموا النعش و بهيده خل تتلوع
هاي الجنازة ابلا لطم ما تقنع
يالله يخوتي اخذوها يم المصرع
مصرع ابو اليمه و نسيل المدمع
خل اشرحلها اشلون جسمه اتگّطع
و شلون ابن جوشن ابصدره اتربع
يم البنين اهنانه طاحت وليان
و اهنا ييمه الخيل لعبت ميدان
اصعب رسالة للخيم وَدوها
بين المخيم و النهر شيعوها
واسوها
نزلوا النعش يم النهر يخواني
اني السبيه و الأسولف اني
اهنا سهم عين الكفيل اعماني
و اهنا ييمه اتگطعت ذرعاني
و اهنا اخويه ابلا ظهر خلاني
ظالم اجاني و الكفل ما جاني
و اهنا ابو الأكبر حنه ظهر و صاح
و اهنا لزم خاصرته و تلوه و طاح
زينب ييمه ابلا اخو عافوها
بين المخيم و النهر شيعوها
واسوها
هاي اللي شمرت عالگمر شيلتها
و اتوجرت قبل الخيم مهجها
قبل الحسين اخيولهم داستها
سهم المثلث ما خطه جبدتها
مو بالمدينة بكربلا موتتها
لازم تصير اويه الأبن دفنتها
هاي الحنينه الـ ذيّعت ست اولاد
و الغربة محجر و الليالي جلاد
سورة وفه و بكل مصيبه اقروها
بين المخيم و النهر شيعوها
واسوها
لا مو يتيم العنده ام مثل امنه
الا ابحضنها جانت اتنومنه
اترف عبارة و تستحي اتكلمنه
اتقبل ادنيه و بالأحضان اتضمنه
صح امنه لكن تفتخر تخدمنه
هيه الجبيرة و بالمشي اتقدمنه
تمشي ورانه و تدعي و الدعوة اتطول
يا هو التشوفه تگله فدوة الـ هالطول
تستاهل ام السبط النبي اتسموها
بين المخيم و النهر
تحميل صيغة mp3
هناا
رد مع اقتباس
