((( كلمات قصيدة )))
لاتناديني بسم يا فاطمة
لاتناديني بسم يا فاطمة
أحسبني ياحيدر أبيتك خادمة
*****
أني بنت أشيوخ اجيتك حره تعرفني العرب
والدي شيخ العشيرة ماخفه عليك النسب
ياعلي بس طلب عندي اتمنى تقبل هالطلب
ما أريد اتصيح بسمي وأنت التعرف السبب
لاتردني بهاي ياحامي الحمة
أحسبني ياحيدر ابيتك خادمة
........................................
أدري أسم فاطمة اتحبه بس يحيدر من صحت
قبل لايوصلني صوتك شفت زينب تلتفت
كبرت اهواي اعله امها تشوفه ماجنه بت
واني هالمنضر فجعني ياعلي وتألمت
زينب اعله اسم الزجية امعلمة
أحسبني ياحيدر ابيتك خادمة
........................................
بهدعش حلمان يوسف واني حلمي بربعة
وباجر التاريخ يذكر بيرهم والمشرعة
جفوفهم جابت قميصه وسولفت عن مصرعة
واني اودي اجفوف لطف بيه تنزل واقعة
حلم ياربي ونول الغانمة
احسبني ياحيدر ابيتك خادمة
.......................................
الله ينطيني اعله نيتي وبيه احقق آمنيات
وهاي اول وحده صارت خادمة ابيت الصلاة
الثانية بشرني بيه علي ورب الكائنات
أني صرت ام البنين وماصرت ام البنات
أسأل الله كون حسن الخاتمة
أحسبني ياحيدر ابيتك خادمة
.......................................
كل ولد من ولدي اريدة لخوته يوكف ضهر
ولو عطش عبد الله كون أيغيم وينزل مطر
من يشوف اولادي بالطف يحترم نفسه النهر
ولدي تعبانه برباهم شابعه عليهم قهر
ماقبل واحد يسولف بالضمة
أحسبني ياحيدر ابيتك خادمة
........................................
هية ألام اتعرف ابنهه وكمر هاشم مفخرة
أبني سبع الدنيا كلها شنهي سبع الكنطرة
الشمر مو خال ولدي ويخسة اربات المرة
ابني ثلثينه اعله ثلثة وكله يشبه حيدرة
ازنود ابو فاضل بغيرة موسمه
أحسبني ياحيدر ابيتك خادمة
........................................
راسي مرفوع ابنيني ولد ابوهم والنعم
الهم الف احساب تحسب من تكابلهم زلم
والمثل عباس جابت تفتخر جابت أسم
مو مهم افكد بنيني عندي الحسين المهم
يشهد عليه علي ورب السمه
أحسبني ياحيدر ابيتك خادمة
الشاعرالمبدع الموفق حيدر الخفاجي
تحميل كلمات القصيدة
من
مركز رفع الملفات درر العراق
ملف ورد
https://www.dorar-aliraq.net/misc.php?do=samer_download&fileid=24709
ملف PDF
https://www.dorar-aliraq.net/misc.php?do=samer_download&fileid=24710
رد مع اقتباس