احلفك بالحليب العطر اكماطك
هونك يانهر ديرتنه
ماكو اخبار
لاطير الاجه
لامن وصل مشحوف
ولاكشايه وي مايك عليها احروف
اوف واوف
درت وجهي زراكك ياولك مخطوف
وكلت وينك يحزن اهلي
تعال اوياي بالمعروف
لاياخوي
ياطيرة عشكنه
التنسل العنكود
كون اتعود
واحنيهه الكصايب
والجفوف وعتبة الساده
وافلك بيرغ المشدود
واشك كل الهدوم السود
بلجي اتعود
ويه الريح ويه الزود
تطر الماي
يامشحوف ديرتنه اخذنه الماي
طر الماي بجدام الخشب مره
ولو طر الجرح مومثل طر الماي
ولو ادري الخشب طبعه
يودي ومايجيب اعزاز
الخشب موكد بجي الجناز
يشمعة بيتنه
جابالكبر ضويت
عمت رازونته وطافي
خليت الحزن بالبيت
ورحت ويه الشته مطره
وعطش للوحشه ذبلني
يهلبت جلمه من يمك
تردلي الوحشه
واتجيبك جرف للروح
خي حتلو عطش للروح
ياهلبت تجي واتروح
ليش الموت ماهدك
وانت ابكل كلب
شط ونخل مامات
بعد بيدك
مناجلنه
ومعاولنه
وبيدك تثبت الرايات
يادلة ذهب حزنك
مر وغالي ياحزنك
ليش الكبر ماهدك وكلك روح
خي حتلو تجي واتروح
ابجيلك
وانعيلك
اشحلاة الثوب
تتبلل اخيوطه ارموش
اشحلاته البالبجي امبلل
وانعيلك نعي الاول
واحزنلك حزن الاول
واكلك وين تالي ردني للاول
جان الوكت راحة بال
صفنة مغزل ابلا ايد
وايدك فرت المغزل
شارع مكبره ابروحي
حريجه ابروحي
من روحي
والدخان ضيع لون كل اجناح
اصياح ابروحي
من روحي
يغوش كل غنه ابروحي
وكل صوت ابهداوه ايخدر اجروحي
واجيب الروح
اجيك اجروح
ابخر كبرك ابدمعي
اعطر روحك ابشمعي
واحلفك بالحليب العطر اكماطك
اكلك مانسيتك كوم
اي بس كوم
امد حزني نهر شفاف
جفي ايصير طاسه لدمعك الشفاف
جاهلبت تنشف الطوس
وتعود للمة احبابك خلك فانوس
عبد الكريم القصاب
رد مع اقتباس