احبچ من نمت بفياي نخلات الشتلهن خالنا سبيتي
احبچ من بنا البنّاي من معدن ذهب طينچ كَسُر بيتي
احبچ يا فلاحيتي***احبچ يا فلاحيتي
****
احبچ يالغفيت ابحضنچ الدافي وغطاي الحاف عتبارچ
احب امعارچ اليحچي ابخبر حمده و يملها البالوحل بارچ
احب فتنه و صريچ اچعاب اخو فتنه اليزوغل چان ويعارچ
***
احب هلهولة ام عيد التهز ايد الفرح بلعيد وتبارچ
احب كوتچ وحب ابيوتچ البيهن احلام ايام تذكارچ
احب سُورچ وحب خُورچ وحب ابخورچ المنتشر بكتارچ
***
احب شطچ وحب اچفايفه الخضره و ضحچها الرگّص اشجارچ
احب ريفچ وحب لبطت مشاحيفيچ الفرها الگنص بهوارچ
احب نورچ وحب نارچ وحب اشتم روايح عطر نُوّارچ
***
احب رشّت مُطر غيميچ وحب ابريمچ اليضحك الگنطارچ
عروس اموشّحه ابنخلچ و هاذ اجمل وشاح الحله ابزنّارچ
احب يومچ وحب امسچ وحب شمسچ اليشرق نورها ابدارچ
***
احب گذلة شعر ليلچ وحب وَجَنة ضحاچ الضوّت انهارچ
احب قهوة سخی امضيفچ الرن فنجانها و شربوه سُمّارچ
احب سُمّارچ السهر و ابنادى البيه علگو زينة اشعارچ
***
احب سنبل فخر زرعچ وحب ضرعچ الدّر دُر سخی الخطارچ
احب ثوارچ الثارو و حبها الهلهلت لفعال ثوّارچ
احب احرارچ الصدّو اجيوش العزّمو يمحون اثارچ
***
احب زلمچ الگصو راس ابو طوگ اليدنّس راد شنيارچ
احب قومچ الهزمو جيش ابو طوب و رجع مغلوب المعارچ
غزوچ الكفر چم مره لچن يخسون ما وصلو الفی دارچ
***
احبن نخوة الغيرة نخوتچ يوم ابعامر تنخيتي
او عله هام الغزو بسلاح عز قومچ الما ذلّو تعلّيتي
احبچ يا فلاحيتي***احبچ يا فلااحيتي
***
و انه ازغير احب كاسچ البي من در لبن خيرچ ترؤّيني
وانه ازغير احب شهدچ اليتگاطر حنان و بي تغذيني
و انه ازغير احب رجتچ المنها ابمسعط امحنتچ تغرّيني
***
وانه ازعير احب مهدچ البي نمت الضحی و بيدچ تهزّيني
او شوفچ چنت بحساسي وحسّن بيچ يم راسي و تحاچيني
محبتچ ثابته اببالي ابدلالي ابوسط چبدي اببطن عيني
***
خيالچ ما يفارجني امرافجني و يلاعبني و يسلّيني
احبچ اي وحق ربچ و ادري ابكثر ما حبچ تحبّيني
احبچ وختلط حبچ ابدم شريان عُمري و مُهجة اسنيني
***
عبير امحبتچ يسري سره ابروحي و سره ابدمي و شراييني
الومه الفارگچ ساعه صعب فرگاچ ما ينحمل ياذيني
يحلوه امعانگچ سلوه قبل ما شبگچ ابشوگچ تشبگيني
***
عِشت بربوعچ الخضره و هواچ امریحني و مایچ امربیّني
ببراچ شرقدت وَدری من ابرد بید تحنانچ تغطيني
اشمالج بالمسه اعذيبي یونّسني و ینعّسني و یغفّني
***
اسابيعيچ تدغدغنی ابطیفی و صوت عاطفتچ تناغینی
او تحرّکني الفجر نسمة صباچ ابمسچ ریحتها توعیني
يمر يحني الصبح لطفچ الشوگه ایجیبنی و للود یدنیني
***
اترابي اترابچ الغالي و طينچ طين جدي او والدي و طيني
امن اموت اتوسّد اترابچ الغيرچ ما اود واحد يودّيني
يحبچ طبعي و ربعي تحب الزارني و بسمچ يغنيني
***
احبّچ مُوش بس هسّاع احبّچ چي شبت وبيضّت الحيتي
احبّچ من چنت ياهل و تتطوطح علی المتنين ترچيتي
احبچ يا فلاحيتي***احبچ يا فلاحيتي
. . ملا فاضل السكراني . .
رد مع اقتباس
المشاركة الأصلية كتبت بواسطة اشراقة امل
