مشاعر طافيه و مابيها لذه شوگ
او هدوء و مستحه چن ملتقي بسرداب
ولا عندك دفو مايجي ابالك صيف
وانا وداعتك شايل سوالف اب
النيته مشگگه يترس الناس فتوگ
الگظاها بمگبره ما خاوه غير غراب
ما مد روحه حدري ما چسيته فياي
ابتليت اصبحت شجره شيقنع الحطاب
احلف بالحطب لو ردت تقنع نار
الطفل حچيه صدگ من يحلف بدولاب
مشيني بدرب واترس عيوني چفوف
من ريحة العنبر اعرف المشخاب
بس اسمك نهر ما بللت عطشان
سيف بلايا دم يلبس الفشله گراب
اجيت ويه المطر واعرف نوايا الگاع
سحگت بطينك و ما شرب طولي تراب
من شفتك فضي وخدودك موردات
گلت يا روحي چا هذا البشر ما حاب
حچي العشاگ من گد ما حلو ينظاگ
وانت مرورتك للحنظل تفك باب
لا تصبح جسر وتضوج لو داسوك
تره صوچ الغنم خله الذياب ذياب
لا تعتب تره الناعور ثلمة ماي
شگد شابع مغمه الجرف بس ينهاب
شفتك دله گلت اچويك بلكي تفوح
وين ادريك من طاري الچوي تنعاب
شمالك مستحي التنور فزعت جوع
بس اهل الكرم بهدومهم عطاب
انا شايف بشر للممشه حذوه تريد
اذا ما تنركب تگضي النهار اعتاب
لاگيتك عمه و گالي الگمر يالون
او گتلك ماكو و اني ادري الگمر ما غاب
چنت ماريد اگله لونه خاف يضوج
اليچذب عل عمى باللون مو چذاب
اذا شاء و متت جنازي ياهو يصير
او منو بفگدي ثغب وانترس وجهه انگاب
اليشيل جنازتي لو ولفي لو ما موت
شحلات جنازتي و شايلها واحد حاب
رد مع اقتباس
