يل مدعي بعطفك والحنان البيك
اجتك روحي طفله شبيك خليها
اجت عطشانه الك متعب درب فرگاك
شوي من شوفتك ماحاجه ترويها
فضل مني و اكابر من يمر طاريك
اسكت سوالفي والعين تحچيها
واذا طولك بطولك يعني ما تنلاح
صعدتلك احلامي الچنت خاطيها
تدري بذكرياتي احديثه بطل عاد
على لسانك بعد لتجيب طاريها
تكفر بالسما وتريد تمطر خير
وتگلي السما ما تمطر شبيها
اگول استغفر الله حپايه منك عود
او ليش استغفر الله انت حاچيها
لا تگلولي سهوا حاچي لا مجبور
اني اعرف حچاها و يمته حاچيها
يگلولي طلع صفصاف مابي خير
واگلهم مثمرة و بچفوفي حاويها
بعد ما اگلك ابني و ادري بيدك فاس
غشيم و صدگت احلامي تبنيها
انا احلامي عزيزه بعزة آخر كاس
رخيصات اعترف بس بيدي بانيها
او علي بكل السوالف الك حصه شيخ
چذاب الي يگلك انت مو بيها
اقل صفنه بعشرتك تاخذلها اسبوع
وحسب بعدك يجوز اشهر يسويها
احملك ذنب كل شيبة طلعت بالراس
المالك بيها يد عندك سبب بيها
اسالك عالجروح البيها الك تذكار
تگلي اتوهمت مالي عرف بيها
لا تسال عليها جروحي لسه بخير
بفضل فرگاك لو نامت يوعيها
گبل من انجرح اذكر الگلته وياي
واچسي سوالفك بجروحي واشفيها
واذا سالوك عني و عن عشرتي وياك
هسه براحتك تنكرها تحچیها
#علي_المنصوري
رد مع اقتباس
