قصيدة الحياة الزوجية
الحياة الزوجية
قدّس المره وخليهه وسط العين
لو بس انت رايد منهه تحترمك
بت ناس وشريفة وانت لختاريت
مو من فطر حايط حتى متهمّك
ذوقك هذا لازم ابد ما ينعاب
دمهه مختلط بالعشره وي دمّك
مو زله بسيطة تسرفن الذرعان
ترضاها اعلى اختك تنضرب يمّك
عافت كل اهلهه واصبحت بحماك
احميهه بدل ما ربك ايذمك
والمشكله تضربهه وگلبهه وسيع
ماتشكي لاهلهه تريد تلتزمك
تشتم تغلط وجهك معبس دوم
لو تهوى المشاكل فرّطت باسمك
مابيهه رجوله الشيخه عل نسوان
مو عل مره دومك شايل بخشمك
تشبع من رغبتك ما حسبْتْ حساب
وتربي جهالك وانت ما همك
بيتك شايلتّه وماكو كل نقصان
متألم گلبهه وتحلم اتضمك
طبع النملة تحمل حمل بالاضعاف
كل هذا ونظرهه مطرز برسمك
تعرف طبعك وتحسبلة الف حساب
من نظرة عيونك هي تفتهمك
نخلة وكل عمرهه مريحة الفلاح
على مدة ايدينك تستلم سهمك
وشكبره كلبهه ومايشيل اثنين
بس انت بكلبهه بشحمك ولحم
ارحم سامح وگلبك سمح خليه
من فوگ الاله بقدرته يرحمك
تقدير المره ويه الرجل متساوين
شوف الله شيكول وزيد بعلمك
مشكلْتْ التفاهم ماتقدره الناس
محد يسأل ويستمع للاسباب
كل مشكله لازم بيهه فد اشكال
حلوهه بصراحه بحضرت الاحباب
لو تقنعني لو اقنعك عقل موجود
لو ما الهه حل خل نسأل الاصحاب
المرأة رقيقة بس حملهه ثگيل
افهم مشكلتهه بفكر واستيعاب
خلي الحچي مگبل واحچي طگ بطگ
ماينفع لون صار الحچي دولاب
دوم العقل خل يتذكر الزينات
تلگه الضيم كله بالمحبة انذاب
انت مو نبي ولا هيه بت معصوم
يا محلى التواضع صفة الاطياب
اسماعيل القريشي
٩/٢/٢٠١٩
لمشاهدة القصيدة اضغط هنا
رد مع اقتباس
المشاركة الأصلية كتبت بواسطة sawsanmahmoud
